Kuri uyu wa Mbere, Perezida w’inama y’ubutegetsi bw’inzibacyuho ya Sudani iri ku butegetsi, Abdel Fattah Al-Burhan, yatangaje ko Gen. Yassin Ibrahim Yassin yagizwe minisitiri w’ingabo w’agateganyo muri iki gihugu, nk’uko iyi nama yabitangaje mu itangazo yasohoye.
Yassin yari yarigeze kuba minisitiri w’ingabo muri guverinoma y’uwahoze ari Minisitiri w’Intebe, Abdalla Hamdok, yasheshwe ku ya 25 Ukwakira 2021.
Ku ya 20 Mutarama, Al-Burhan yashyizeho guverinoma y’agateganyo y’abaminisitiri 15 nk’uko iyi nkuru dukesha Reuters ibyibutsa.
Sudani yahuye n’ibibazo bya politiki nyuma y’uko Al-Burhan, ari na we muyobozi mukuru w’ingabo za Sudani, yatangaje ibihe bidasanzwe ku ya 25 Ukwakira 2021 maze asesa Inama y’Ubutegetsi na guverinoma.
Kuva icyo gihe, amatsinda atavuga rumwe n’ubutegetsi yagiye akora imyigaragambyo rusange mu murwa mukuru wa Sudani, Khartoum, no mu yindi mijyi asaba gusubiza ubutegetsi abasivili.
Iyi myigaragambyo imaze kwicirwamo abantu basaga 80 barimo na babiri bishwe mu myigaragambyo yo kuri uyu wa Mbere.
