Ba Guverineri b’intara 6 z’u Burundi bari bayobowe na Meya w’umujyi wa Bujumbura, Jimmy Hatungimana, boherejwe muri Teritwari ya Uvira, Intara ya Kivu y’Amajyepfo muri Repubulika ya Demukarasi ya Congo (RDC).
Muri iyi Teritwari, aba bayobozi bo mu Burundi bakiriwe na Guverineri wa Kivu y’Amajyepfo, Théo Kasi, abandi bayobozi muri iyi ntara hamwe n’abo mu nzego zishinzwe umutekano.
Nk’uko Guverineri Kasi yabitangarije kuri Twitter, impande zombi zaganiriye ku ngingo z’ingenzi zirimo: ubufatanye mu by’umutekano, mu bucuruzi no mu rwego rw’ubuzima.
Ku rwego rw’ubuzima, baganiriye by’umwihariko ku bufatanye bwo kurwanya ikwirakwira ry’icyorezo cya Covid-19 ku mipaka ibihugu byombi bihuriyeho.
Teritwari ya Uvira ni yo Leta y’u Burundi yemeza ko umutwe witwaje intwaro wa RED Tabara uyirwanya, ari ho ukorera, wifatanyije n’indi ikomoka muri RDC.
