Umuyobozi w’ibitaro bya mbere biteye imbere mu Burundi ari mu maboko y’urwego rw’ubutasi

Dr. Christophe Sahabo ukuriye ibitaro bya mbere biteye imbere mu gihugu cy’u Burundi bizwi nka Kira Hospital afungiye muri kasho y’ubutasi bw’igihugu (National Intelligence Service) mu murwa mukuru w’ubukungu Bujumbura kuva ku wa gatanu ushize. Mu mpera z’icyumweru gishize, yamenyesheje Inama y’Ubuyobozi ko yeguye ku mirimo ye ariko amakuru avuga ko yabihatiwe.

Ku wa Gatandatu, Jean David Pillot, ufite ubwenegihugu bw’u Bufaransa wafatiwe rimwe na Dr Sahabo kandi akaba umuyobozi w’inama y’ubuyobozi y’Ibitaro bya Kira, yahise arekurwa kuwa Gatandatu nk’uko iyi nkuru dukesha SOS Media Burundi ivuga.

Amakuru aturuka mu gipolisi avuga ko umuyobozi w’ibitaro bya Kira yari akiri muri kasho y’urwego rw’ubutasi (SNR) mu murwa mukuru w’ubukungu Bujumbura kugeza mu gitondo cyo kuri uyu wa Gatatu.

“Ni ibisanzwe ko afungiye aho, ashobora no kujyanwa muri kasho ya polisi, ariko ni ko bimeze kubera ko mu iperereza, hari na OPJ (abapolisi b’ubucamanza) bakora iperereza bagakora dosiye mbere yo kuyohereza ku bushinjacyaha, ”ibi bikaba byavuzwe n’umupolisi wa PNB (Polisi y’igihugu cy’u Burundi) avugana n’iki kinyamakuru.

Uyu muyobozi yongeyeho ati: “itandukaniro ryonyine nuko muri SNR, bafite amahirwe yo gukora iperereza mu gihe kitazwi.”

Ibitaro bya Kira ni ivuriro rikomeye mu Burundi ryubatswe kuri miliyari zirenga 28 z’amafaranga y’u Burundi (miliyoni 14 z’amadolari). Ibi bitaro byatashywe ku mugaragaro mu 2015.

Umugabo ufunzwe niwe uteza imbere umushinga, aho benshi mu bashoramari n’abanyamigabane ari Abasuwisi. Mu mpera z’icyumweru gishize, ibaruwa y’abanyamigabane b’Abarundi yakwirakwijwe ku mbuga nkoranyambaga z’Abarundi ivuga ko Dr Sahabo atagifitiwe icyizere.

“Itsinda ry’abanyamigabane bahagarariye uruhande rw’Abarundi, rigizwe ahanini n’amasosiyete ya Leta kandi ryitabiriwe n’abaturage barashaka kubagezaho ko guhera kuri iyi tariki, hashingiwe ku kurenga ku mategeko menshi, ku micungire mibi n’uburiganya (…) bivugwa kuri Dr. Christophe Sahabo, rimukuyeho icyizere kandi risaba ko yahita yirukanwa,” ibi ni ibikubiye mu ibaruwa yohererejwe inama y’ubutegetsi ku ya 1 Mata kandi igashyirwaho umukono n’abantu babiri bahagarariye Socabu (Isosiyete y’Ubwishingizi mu Burundi), uhagarariye Pansiyo y’igihugu n’Ibiro bishinzwe ibibazo by’akazi (ONPR), uhagarariye ikigo gishinzwe kugura imiti y’ingenzi cy’u Burundi (Camebu) n’uhagarariye Burundi Airlines.

Uruhande rw’abanyamigabane b’Abarundi ruvuga ko rutazongera kwitabira inama mu gihe Inama y’Ubuyobozi izaba itagize icyo ikora ku busabe bwarwo. Basabye kandi mu ibaruwa bandikiye umuyobozi w’inama y’ubuyobozi, isaranganya rishya ry’imigabane yihariwe ahanini n’amatsinda y’abanyamahanga.

Umwe mu baganga bo ku Bitaro bya Kira we yagize ati: “Araregwa kuba adashobotse kubera ko yari yanze ko ibitaro biba ikibuga cya politiki, ibimenyetso ni uko mu Gushyingo (2021) yohererejwe abaganga 20 b’Abarundi bari barangije amasomo yabo mu Burusiya. Ntabwo bari bafite uburambe mu mwuga wo gukora kandi ntabwo umuntu uwo ari we wese wari wabazanye, ahubwo ni ubunyamabanga bw’ishyaka riri ku butegetsi ariko Dr Sahabo yasabye imikorere myiza, bikangura urwango yangwaga kuva Kira yashingwa, kuko we aregwa kuba akorera abanyamigabane b’abanyamahanga. ”