Minisitiri w’Ububanyi n’Amahanga wa Somalia, Abdisaid Muse Ali yarusimbutse, nyuma y’igitero we n’abo bari kumwe bagabiweho mu mujyi wa Galkayo.
Ni umujyi uherereye mu gace ka Puntland, ku birometero 750 mu majyaruguru y’Umurwa mukuru Mogadishu.
Minisitiri Abdisaid yatangaje ko igitero yagabweho cyari kigambiriye gutwara ubuzima bwe.
Amakuru aturuka mu mujyi wa Galkayo avuga ko ubwo icyo gitero cyabaga habaye ukurasana kwabereye mu mbuga y’umukuru w’ubwoko bw’abatuye kariya gace wari wakiriye Minisitiri Abdisaid ngo basangire ifutari.
Amakuru avuga ko iki gitero cyiciwemo abantu benshi, kikaba cyagabwe n’Ingabo z’inkoramutima za Puntland, imwe muri Leta iherereye mu majyaruguru ya Somalia.
The East African yatangaje ko iyi mirwano yiciwemo umwe mu barinzi ba Minisitiri w’Ububanyi n’Amahanga wa Somalia, na ho Abdisamad wari wamwakiriye iwe arakomereka.
Guverinoma w’agace ka Mudug ho muri Puntland, Abdilatif Muse Nur, nyuma ya kiriya gitero yanenze Minisitiri Abdisaid kuba yabaye intandaro y’iriya mirwano.
Ati: “Ndagira ngo menyeshe rubanda muri Puntland ndetse n’abantu ba Somalia muri rusange ko imirwano yabereye mu mujyi wa Galkayo yatewe na Minisitiri w’Ububanyi n’Amahanga wa Somalia, Muse Ali, waje mu mujyi mu icengezamatwara rya Politiki zidashinga.”
Andi makuru avuga ko Abdisamad wari wakiriye uriya muminisitiri iwe yari atabanye neza na Perezida wa Puntland, Said Abdullahi Deni kuri ubu uri kwiyamamariza i Mogadishu kuba Perezida wa Somalia; ikaba intandaro ya kiriya gitero.
