Minisitiri w’Intebe w’u Bwongereza, Boris Johnson, yasimbutse urubanza rwo kweguzwa, atanga ubutumwa ku baturage bakimufitiye icyizere n’abari barakimutakarije.
Boris amaze iminsi ari ku gitutu gikomoka ku birori byo mu 2020 n’2021 yakoreye muri Party Gate mu gihe cya Guma mu Rugo yashyizweho mu gukumira ubwandu bw’icyorezo cya Covid-19 bwari bukomeje kwiyongera.
Ibi birori byatumye akorwaho iperereza ryayobowe n’umudepite mu nteko ishinga amategeko y’u Bwongereza, Stephen William Hammond, usanzwe ari umuyoboke w’ishyaka riri ku butegetsi, Conservative, raporo yaryo ijya hanze muri Gicurasi 2021.
Iyi raporo yagaragaje ko ibi birori byateje imfu z’abantu benshi banduye Covid-19 kubera kutubahiriza amabwiriza yo kuyirinda, ituma abadepite 54 muri 359 bahagarariye Conservative basaba ko habaho itora, Boris akeguzwa.
Nk’uko Al Jazeera ibisobanura, Sir Graham Stuart Brady uri mu buyobozi bwa Conservative, yatangaje ko uyu mubare ari wo wabaye imbarutso yo gusaba ko habaho itora.
Kuri uyu wa 6 Kamena 2022, itora ryabaye, ariko abadepite 211 bashyigikira ko Boris aguma kuri iyi nshingano, abandi 148 basaba ko yeguzwa. Ubwiganze bw’amajwi bwahawe agaciro, uyu munyapolitiki arokoka atyo.
Amaze kubona ko atsinze, Boris yagejeje ijambo ku Bongereza, abamenyesha ko umubare w’abamushyigikiye ari munini, yemeza ko guverinoma ye igiye kwibanda ku bihangayikishije. Ati: “Ndatekereza ko ari umusasuro mwiza, uhamye kandi usobanuye ko nka guverinoma tugomba gukomeza, tukibanda ku bihangayikishije abaturage.”
Iyo Boris Johnson yeguzwa, n’abagize guverinoma ye yose bari kwegura, nyuma hakaba hari kuzabaho amatora y’umusimbura, utsinze akishyiriraho guverinoma ye.
