Ikipe ya Manchester City ikomeje gushakisha umukinnyi wa Arsenal akaba n’umukinnyi w’ikipe y’igihugu y’u Bwongereza, Bukayo Saka, nyuma y’aho iyi kipe y’i Londres inaniwe kubona itike yo gukina imikino ya UEFA Champions League.
Manchestrer City inaheruka gutwara igikombe cya shampiyona y’u Bwongereza imaze gutera intambwe yo kwegukana Saka usigaje imyaka 2 ngo arangize amasezerano ye muri Arsenal.
Arsenal irifuza gusinyisha Saka amasezerano y’igihe kirekire, gusa ikinyamakuru Daily Mail kivuga ko uyu mukinnyi ashaka kwitabira irushanwa rya UEFA Champions League rikomeye ku mugabane w’i Burayi, ibi bikaba biha amahirwe Manchester City.
Mu gihe Saka atarafata icyemezo kidakuka cy’ahazaza he mu mupira w’amaguru, bivugwa ko Arsenal yamwegereye, kugira ngo irebe ko yazagumamo na nyuma y’imyaka ibiri.
Manchester City iherutse kwegukana rutahizamu Erling Halaand wakiniraga Borussia Dortmund mu Budage. Irashaka kongera imbaraga mu busatirizi no mu mwanya wo hagati.
Iyi kipe yo mu mujyi wa Manchester yageze muri 1/2 cya Champions League nyuma y’aho mu mwaka wabanje yageze ku mukino wa nyuma (final). Ni mu gihe Arsenal yo idaheruka muri iri rushanwa yarangije shampiyona y’u Bwongereza iri ku mwanya wa gatanu.
