General Charles Bisengimana wabaye Umuyobozi Mukuru wa Polisi ya Repubulika ya Demukarasi ya Congo (RDC) n’abandi basirikare bakuru bari mu batangabuhamya bashobora kwifashishwa mu rubanza rw’uwahoze ari umujyanama wihariye mu by’umutekano wa Perezida Félix Tshidekedi, François Beya Kasonga.
Beya ukurikiranweho icyaha cyo kugambirira kugirira nabi Umukuru w’Igihugu afatanyije n’abandi barimo Brig. Gen. Tonton Twad Sekere watorotse ubutabera na Col. Cikapa Tite Mokili David, yasubiye mu rukiko rukuru rwa gisirikare kuri uyu wa 1 Nyakanga 2022.
Abanyamategeko b’uyu munyapolitiki utemera iki cyaha akurikiranweho, bahaye umucamanza urutonde rw’abatangabuhamya bifuza ko bazagaragara muri uru rubanza bamushinjura, biganjemo abapolisi bakuru.
Aba batangabuhamya barimo Gen. Bisengimana, Gen. Sylvano Kasongo (Komiseri wa Polisi muri Kinshasa), Gen. Célestin Kanyama (Umuyobozi w’ishuri rikuru rya Polisi), Jean-Hervé Mbelu uyobora urwego rw’ubutasi (ANR) na Kashatwale uyobora urwego rw’abinjira n’abasohoka.
Aba batangabuhamya biyongera ku bo ubushinjacyaha bwasabye ko bazagaragara mu rubanza babashinja, barimo: Gen. Maj. Mbala Madiangu Michel, Brig. Gen. Makombo na Gen. Mulongo John.
Uruhande rw’uregwa n’ubushinjacyaha zihurira ku mutangabuhamya Gen. Sylvano Kasongo. Zombi zifuza ko yazagaragara muri uru rubanza.
Beya wigeze kuyobora ANR yatawe muri yombi tariki ya 5 Gashyantare 2022, abanza gufungirwa muri kasho y’uru rwego, nyuma yimurirwa muri gereza nkuru ya Makala.
Inkuru bifitanye isano https://bwiza.com/?Francois-Beya-wahoze-ari-umujyanama-wa-Tshisekedi-akurikiranweho-gushaka
