Ikipe ya Rayon Sports yamaze gutandukana n’abakinnyi batandatu, barimo umunyezamu w’Ikipe y’Igihugu ‘Amavubi’, Kwizera Olivier.
Iyi kipe yemeje aya makuru ibinyujije kuri chaîne yayo ya YouTube.
Abakinnyi Rayon Sports yamaze gusezerera barimo Kwizera Olivier, rutahizamu uca ku mpande Ishimwe Kevin na myugariro Habimana Hussein ‘Eto’o’.
Aba kandi barimo myugariro w’iburyo Nizigiyimana AbdulKalim MacKenzie, Bukuru Christophe na Sekamana Maxime.
Kwizera Olivier biravugwa ko ashobora gusanga umutoza Mashami Vincent muri Police FC, mu gihe Mackenzie na Habimana Hussein bavugwa muri Kiyovu Sports.
Amakuru kandi avuga ko Sekamana Maxime na Ishimwe Kevin bo bashobora kuzashyira umukono ku masezerano yo gukinira Musanze FC.
Hari n’abandi byitezwe ko bazatandukana n’iyi kipe, ariko hakaba hategerejwe kubanza kureba uko ikipe izitwara ku isoko rizafunga ku wa 18 Kanama 2022.
