Intumwa z’u Rwanda n’iza Repubulika ya Demukarasi ya Congo (RDC) zateraniye i Luanda muri Angola mu nama yo gukemura amakimbirane yatutumye hagati y’ibihugu byombi bitewe n’impamvu z’umutekano.
Ku ruhande rw’u Rwanda, izi ntumwa ziyobowe na Minisitiri w’ububanyi n’amahanga n’ubutwererane, Dr Vincent Biruta. Iza RDC zo ziyobowe na Minisitiri w’ububanyi n’amahanga, Christophe Lutundula.
Uruhande rwa Angola rufite inshingano y’ubuhuza muri ibi biganiro, ruyobowe na Minisitiri w’ububanyi n’amahanga w’iki gihugu, Ambasaderi Téte Antonio.
Muri iyi nama yari yarasubitswe mu cyumweru gishize kubera ko Angola yari mu kiriyo cy’urupfu rwa Jose Eduardo dos Santos wayoboye iki gihugu, izi ntumwa ziraganira ku birego u Rwanda na RDC bishinjanya.
U Rwanda rushinja ingabo za RDC kurasa ibisasu ku butaka bwarwo no kwifatanya n’umutwe witwaje intwaro wa FDLR muri ibi bikorwa, RDC igashinja ingabo zarwo kugaba ibitero ku butaka bwayo, binyuze mu mutwe wa M23.
Perezida w’u Rwanda, uwa RDC n’uwa Angola bahuriye i Luanda tariki ya 6 Nyakanga 2022, bafashe umwanzuro wo guhosha uyu mwuka mubi watutumye hagati y’ibi bihugu, banemeza ishyirwaho rya komisiyo ihuriweho igizwe n’izi ntumwa ziragirana ikiganiro cy’iminsi ibiri.
