Ikigo cy’igihugu cy’iteganyagihe, Meteo Rwanda, cyatangaje ko mu minsi itatu hateganyijwe imvura izaturuka mu ishyamba ryo muri Congo (Repubulika ya Demukarasi ya Congo).
Mu butumwa iki kigo cyashyize kuri Twitter kuri uyu wa 28 Nyakanga 2022, cyasobanuye ko imvura itaherukaga kugwa izaturuka n’ubuhehere bw’ishyamba ryo mu gihugu cy’abaturanyi.
Yagize iti: “Hateganyijwe imvura hagati y’italiki ya 29/7/2022 na taliki ya 1/8/2022 izaturuka ku buhehere bw’umwuka uturuka mu ishyamba rya Congo buzagera mu Rwanda.”
Meteo yasobanuye ko imvura iringaniye iteganyijwe mu bice byinshi bigize intara y’Amajyaruguru n’iy’Uburengerazuba, ahasigaye hagwe nkeya. Iti: “Imvura iringaniye iteganyijwe mu bice byinshi bya RwandaNorth na RwandaWest. Ahasigaye hateganyijwe imvura nke.”
Iki kigo cyatangaje ko nyuma y’iyi mvura, ibihe by’Impeshyi (birangwa n’izuba ryinshi) bizakomeza.
