Ikipe yahagarariye u Rwanda mu mukino wa Beach Volleyball mu marushanwa ya Commonwealth ari kubera mu mujyi wa Birmingham mu Bwongereza, ntiyabashije kwegukana umwanya wa gatatu.
Iyi kipe igizwe na Ntagengwa Olivier na Gatsinzi Venuste mu mikino ya ½ cy’irangiza (semifinal) yabaye ku wa 6 Kanama 2022, yatsinzwe n’iya Australia seti ebyiri ku busa, imwe ku manota 21 kuri 18 na 21 kuri 14.
Mu mukino wo gushaka umwanya wa gatatu, ikipe y’u Rwanda yatsinzwe n’iy’u Bwongereza igizwe na Joaquin na Javier Bello seti ebyiri ku busa (2-0), iya mbere ku manota 21 kuri 11 na 21 kuri 12.
Bivuze ko ikipe y’u Rwanda yegukanye umwanya wa kane muri uyu mukino. Iya Australia ni yo yatwaye igikombe, itsinze iya Canada seti ebyiri kuri imwe.
