Ingabo z’u Burundi zamaze kugera muri teriotwari ya Uvira, intara ya Kivu y’Amajyepfo muri Repubulika ya Demukarasi ya Congo (RDC) muri gahunda y’umuryango w’akarere ka Afurika y’iburasirazuba (EAC) yo kurwanya imitwe yitwaje intwaro.
Urubuga SOS Burundi rwo ruvuga ko ingabo zamaze kugera muri Uvira ari 600. Ati: “FARDC yemeje ko ingabo z’u Burundi zirenga 600 zinjiye muri Kivu y’Amajyaruguru kuri uyu wa Mbere.”
Umuvugizi w’ibikorwa by’igisirikare cya RDC bya Sokola 2 bibera muri iyi ntara, Lt Marc Elongo, nk’uko ikinyamakuru 7sur7 cyabitangaje, yemeje ko ingabo z’u Burundi zahageze kuri uyu wa 15 Kanama 2022, kandi ko zaje hashingiwe ku mwanzuro wa EAC.
Lt Elongo yagize ati: “Guhera kuri uyu wa Mbere, ingabo z’u Burundi zinjiye mu karere ka Sokola 2 muri Kivu y’Amajyepfo. Izi ngabo ziri ku kigo cy’imyitozo cya Luberizi kandi zaje muri gahunda yemejwe n’abakuru b’ibihugu bya EAC.”
Ibikorwa bihuriweho by’ingabo za RDC n’iz’u Burundi byo kurwanya imitwe yitwaje intwaro ikorera muri Kivu y’Amajyepfo bizayoborwa na Gen. Ramazani Fundi usanzwe ari Komanda wa Operasiyo Sokola 2 muri iyi ntara.
Gen. Fundi yasabye abaturage bo muri iyi ntara gutuza, bagakorana n’ingabo za Leta mu rwego rwo kugira ngo iki gikorwa cyo guhiga imitwe yitwaje intwaro kigende neza nk’uko cyateganyijwe.
Imitwe yitwaje intwaro ikorera muri iyi ntara irimo RED Tabara, FOREBU na FNL ikomoka mu Burundi na Mai Mai zitandukanye zikomoka muri RDC.
