Ikipe ya Rayon Sports yemeje ko yamaze gutegura umukino wa gicuti na Singida United yo muri Tanzania isanzwe ikinamo rutahizamu Meddie Kagere w’ikipe y’Igihugu ‘Amavubi’.
Rayon Sports na Singida bazipima ku wa 04 Nzeri, mu mukino ugomba kubera kuri Stade ya Kigali i Nyamirambo.
Ni umukino byitezwe ko ugomba gufasha Rayon Sports gukomeza kwitegura neza imikino ya shampiyona igomba gusubukurwa muri Nzeri hakinwa kuva ku munsi wa kabiri wa shampiyona.
Uretse Kagere, Singida United byitezwe ko igomba kuzana i Kigali abandi bakinnyi b’ibigangange barimo myugariro Sergio Wawa Pascal bahoze bakinana muri Simba Sports Club cyo kimwe na Deus Kaseke wakiniye Young Africans.
Rayon Sports izipima na Singida nyuma ya Mukura VS bazahurira kuri Stade ya Kigali i Nyamirambo ku wa Gatatu tariki ya 31 Kanama cyo kimwe na Uganda Revenue Authority (URA) bazahura ku wa 02 Nzeri.
