Umutoza wa US Monastir yavuze umukinnyi wa APR FC uzaba igihangange nadasubira inyuma

Umunya-Serbie Darko Novic utoza ikipe ya US Monastir yo mu gihugu cya Tunisie, yashimye urwego rwa rutahizamu Mugunga Yves wa APR FC; avuga ko mu gihe yaba adasubiye inyuma ashobora kuzavamo umukinnyi mwiza.

Uyu mutoza yabigarutseho nyuma y’umukino wa CAF Champions league ikipe ye yasezereyemo APR FC ku bitego 3-1 wabereye kuri Stade ya Mustapha Ben Jannet ejo ku Cyumweru.

Rutahizamu Yves Mugunga ni we watsindiye APR FC igitego 1-0 yatsinze Monastir mu mukino ubanza wabereye i Huye, mbere y’uko iyi kipe y’Ingabo z’Igihugu itsindwa ibitego 3-0 mu mukino wo kwishyura wabereye muri Tunisie.

Igitego cyo ku munota wa kane w’umukino cya Zied Aloui, icyo ku wa 27 w’umukino cya Houssem Tka ndetse n’icy’umunya-Nigérie Youssouf Oumarou Alio cyo ku munota wa 68 w’umukino ni byo byafashije Monastir gusezerera APR FC.

Muri uyu mukino abasore b’umutoza Mohammed Adil Erradi babonye butatu bukomeye bwashoboraga kuvamo ibitego, burimo amashoti Omborenga Fitina na Manishimwe Djabel batereye inyuma y’urubuga rw’amahina bikaba ngombwa ko imipira yoherezwa muri Koruneri n’umunyezamu Ben Said; mu gihe umupira Nshuti Innocent yateye n’umutwe waciye gato hejuru y’izamu.

Nyuma y’umukino umutoza Novic yavuze ko APR FC yabagoye cyane bijyanye n’uko yitwaye mu mukino ubanza, yitsa cyane kuri Mugunga yavuze ko azavamo umukinnyi ukomeye.

Ati: “Umukino ubanza waratugoye kuko twakinnye n’ikipe dusanzwe tuzi uburyo ikina; rero twagombaga kwitwararika kugira ngo tudatsindwa ibitego byinshi. Mu mukino wo kwishyura twaje twiteguye kwisubiza icyubahiro.”

Yakomeje agira ati: “Ikipe twakinnye na yo si ikipe yoroshye n’ubwo twayisezereye, kubera ko bagerageje kwitwara neza by’umwihariko mu mukino twakiniye iwabo; rutahizamu wadutsinze igitego [Mugunga] ashobora kuzavamo umukinnyi mwiza naramuka adasubiye inyuma.”

Nyuma yo gusezerera APR FC, US Monastir yahise isanga Al Ahly yo mu Misiri mu ijonjora rya kabiri rya Champions league.