Umujyanama wihariye wa Leta zunze ubumwe za Amerika (USA) mu by’umutekano, Jake Sullivan, yateguje u Burusiya akaga gakomeye mu gihe bwagerageza gukoresha intwaro kirimbuzi mu ntambara yabwo na Ukraine.
Ni mu gihe mu Burusiya hari kubera amatora ya kamarampaka agamije kumenya uko abaturage bumva gahunda yo komeka ku gihugu cyabo bimwe mu bice bya Ukraine, birimo Leta ya Donetsk na Luhansk ziyoborwa n’abatavuga rumwe n’ubutegetsi.
Perezida w’u Burusiya, Vladimir Putin, aherutse gutangaza ko mu gihe ibi bice byazaba byaramaze komekwa ku gihugu cyabo, bazakoresha uburyo bushoboka bwose mu kubirinda nka bumwe mu butaka bugize igihugu cyabo, byazaba ngombwa hakifashishwa n’intwaro kirimbuzi.
Uyu mugambi watewe utwatsi na USA, umunyamabanga wayo ushinzwe ububanyi n’amahanga, Antony Blinken, amenyesha abitabiriye Inteko Rusange y’Umuryango w’Abibumbye ko igihugu cye kizakomeza gushyigikira Ukraine mu gukumira ko hari ubutaka yakwamburwa.
Jake Sullivan mu kiganiro yagiranye na NBC kuri uyu wa 25 Nzeri 2022 yatangaje ko u Burusiya nibukoresha intwaro kirimbuzi muri Ukraine, USA izasubiza yivuye inyuma, bibyare akaga gakomeye kuri iki gihugu gishinjwa ubushotoranyi.
Yagize ati: “U Burusiya niburenga umurongo, buzahura n’ingaruka z’akaga bikomeye. Leta zunze ubumwe zizasubiza zivuye inyuma.”
Sullivan na Blinken batangaje ibi mu gihe Minisitiri w’ububanyi n’amahanga w’u Burusiya, Sergei Lavrov, we yemeza ko USA ikomeje kwenyegeza umuriro kuri iki kibazo, bigatuma Ukraine itemera ko haba imishyikirano y’ubunyangamugayo yabonekamo igisubizo.
Ariko USA yo iremeza ko u Burusiya bugomba guhagarika ‘intambara’ bwashoje kuri Ukraine, bitaba ibyo bugakomeza gufatirwa ibihano. Yizeza iki gihugu cyatewe ko kizakomeza guhabwa ubushobozi bw’igisirikare bwagifasha kwivuna umwanzi.
