Minisitiri w’Intebe mushya w’u Bwongereza, Liz Truss, amaze kwegura kuri uyu mwanya nyuma y’igitutu yari akomeje gushyirwaho na bamwe mu bagize inteko ishinga amategeko.
Truss yatangarije ubwegure bwe hanze y’ibiro bye, asobanura ko yabonye atashobora gukora iyi nshingano yatorewe, kandi ngo yanamaze kubimenyesha Umwami Charles III.
Uyu munyapolitiki wari umaze iminsi 45 atangiye iyi nshingano yasimbuyeho Boris Johnson na we weguye, yasobanuye ko amatora y’uzamusimbura azaba mu cyumweru gitaha.
Ubwegure bwa Truss bukurikiye ubw’Umunyamabanga ushinzwe ubutegetsi n’umutekano, Suella Braverman, weguye kuri uyu wa 19 Ukwakira kubera ikosa yakoze ryo koherereza umushingamategeko yizeraga inyandiko y’ubutegetsi akoresheje imeyili (email) ye bwite, na we akayisangiza bagenzi be.
