Ikipe y’Igihugu ya Misiri ku wa Gatanu yatsinze iy’u Bubiligi ibitego 2-1, mu mukino wa gicuti Ababiligi biteguriragamo Igikombe cy’Isi cya 2022 kibura umunsi kigatangira muri Qatar.
Les Diables Rouges y’u Bubiligi na Les Pharaohs ya Misiri bari bahuriye kuri Stade Mpuzamahanga ya Jaber al-Ahmad muri Kuwait, mbere y’uko Ababiligi bahaguruka berekeza muri Qatar ahazabera imikino y’Igikombe cy’Isi.
Igitego cyo ku munota wa 33 w’umukino cya Mostafa Mohamed Ahmed Abdallah usanzwe akinira Nantes yo mu Bufaransa ndetse n’icyo ku wa 46 cya Mahmoud Ahmed Ibrahim Hassan bita TrĂ©zĂ©guet, ni byo byafashije Misiri kwegukana intsinzi muri uyu mukino.
Ni umukino ku ruhande rwa Misiri wanagaragayemo Mohamed Salah, rutahizamu wa Liverpool yo mu Bwongereza iyi kipe igenderaho.
U Bubiligi bwari bwabanje mu kibuga abarimo Thibaut Courtois na Eden Hazard ba Real Madrid cyo kimwe n’abarimo Kevin De Bruyne, Yannick Ferreira Carasco na Mitshy Batshuayi bwabonye impozamarira ku munota wa 76 w’umukino biciye kuri Ikoma-LoĂŻs Openda winjiye mu kibuga asimbura.
Nta kipe wavuga ko yarushije indi cyane mu bijyanye no kurema amahirwe menshi y’ibitego, n’ubwo u Bubiligi bwarushaga Misiri mu bijyanye no gutindana umupira.
U Bubiligi biteganyijwe ko buzakina umukino wa mbere w’Igikombe cy’Isi buhura na Canada, mu mukino wa mbere wo mu tsinda F uteganyijwe ku wa Gatatu tariki ya 23 Ugushyingo.
Iyi kipe y’umutoza Roberto Martinez nyuma y’aho izakina na Maroc (ku Cyumweru gitaha) mbere yo gusoreza imikino y’itsinda F kuri Croatia bazahura ku wa Kane tariki ya 01 Ukuboza 2022.
