Igikombe cy’Isi: Caméroun yandikiye kuri Brésil amateka atarakorwa n’ikindi gihugu cya Afurika

Ikipe y’Igihugu ya Caméroun ‘Les Lions Indomptables’, yaraye ikoze amateka yo kuba igihugu cya mbere cyo ku mugabane wa Afurika gishoboye gutsinda Brésil mu mikino y’Igikombe cy’Isi.

Iyi kipe y’umutoza Rigobert Song yabigezeho nyuma yo gutsinda La Seleção igitego 1-0, mu mukino usoza itsinda G wabaye mu ijoro ryakeye.

Ni igitego cy’amateka cyinjiye ku munota wa 90+2 gitsinzwe na rutahizamu Vincent Aboubakar; mbere yo kwiyambura umupira yari yambaye agahita yerekwa ikarita itukura.

Uyu rutahizamu yatsinze iki gitego nyuma yo gihindurirwa umupira na myugariro w’iburyo Ngom Mbekeli agahita awutereka mu izamu n’umutwe.

Intsinzi ya Caméroun cyakora cyo ntiyigeze iyifasha kurenga itsinda ngo igere muri ? cy’irangiza; bijyanye no kuba u Busuwisi basaga nk’abahanganye bwatsinze Serbie ibitego 3-2.

Igitego cyo ku munota wa 48 w’umukino cya Remo Freuler ni cyo cyatandukanyije amakipe yombi, nyuma y’uko igice cya mbere cy’umukino cyari cyarangiye anganya ibitego 2-2.

Xerdan Shaqiri ni we wari wabanje gufungurira amazamu u Busuwisi ku gitego yatsinze ku munota wa 20 w’umukino, mbere y’uko Aleksandar Mitrovic akishyurira Serbie nyuma y’iminota itandatu.

Iyi Serbie yayoboye umukino ku munota wa 35 biciye ku gitego cya kabiri yatsindiwe na Dusan Vlahovic; gusa Breel Embolo aza kwishyurira u Busuwisi mbere y’uko igice cya mbere cy’umukino kirangira.

Brésil yarangije imikino yo mu tsinda G ari iya mbere n’amanota 6 izahurira muri ? cy’irangiza na Koreya y’Epfo; mu gihe u Busuwisi banganyaga amanota buzahura na Portugal.