Betrand Bisimwa yatangaje ko FDLR isubiye mu Rwanda, na M23 ishobora kurambika intwaro

Perezida w’umutwe witwaje intwaro wa M23, Bertrand Bisimwa, yatangaje ko mu gihe abarwanyi ba FDLR basubira mu Rwanda, byashoboka cyane ko na bo barambika intwaro kuko ngo ni yo ntandaro y’umutekano muke mu burasirazuba bwa Repubulika ya Demukarasi ya Congo (RDC).

Bisimwa yabitangarije mu kiganiro M23 yagiranye n’abanyamakuru muri Bunagana kuri uyu wa 14 Ukuboza. Uwa BWIZA yamubajije ati: “Mwavuze ko FDLR iri kwica abantu. Ese uyu mutwe muvuga ko uteza ibibazo birimo gukwirakwiza ingengabitekerezo ya jenoside muri RDC, wemeye gusubira mu Rwanda, ugahagarika ibikorwa bibi, mwahagarika intambara? Ni iki cyakurikiraho?”

Uyu munyapolitiki yasubije ko kuba kwa FDLR muri RDC biteza ibibazo kuko ari yo itoza imitwe yitwaje intwaro ikora ubugizi bwa nabi muri iki gihugu irimo za Mai Mai na Nyatura, bityo ako abarwanyi bayo barambitse intwaro bagataha mu Rwanda, na we ashobora kuba uwa mbere uva muri M23.

Yagize ati: “FDLR ituviriye mu gihugu, igasubira mu Rwanda, ikajya kubana mu mahoro n’abavandimwe bayo, byaba ari byiza, byatuma tuva mu ntambara. Iyi FDLR ni yo itoza iyi mitwe yitwaje intwaro y’Abanyekongo. Iyi mitwe isenyutse kubera ko FDLR yaba yasubiye mu gihugu ikomokamo, Eeeh bwana! Ndakubwira ko ari njye waba uwa mbere uvuga ‘Ah! Noneho amahoro araje.”

M23 ivuga ko icyo iharanira atari ugufata ibice bya RDC kuko ngo iyo iza kuba ibifite muri gahunda, iba yarageze no mu murwa mukuru, Kinshasa, ahubwo ngo ishaka amahoro.