Impunzi z’Abanyekongo zo mu bwoko bw’Abatutsi zandikiye ambasade zitandukanye ziri muri Kenya, zizimenyesha ko zibangamiwe no kuba zimaze imyaka irenga 25 ziba mu nkambi kandi zifite igihugu cy’inkomoko, ari cyo Repubulika ya Demukarasi ya Congo.
Muri iyi baruwa zageneye ambasade z’ibihugu 9 birimo u Rwanda ndetse n’imiryango mpuzamahanga tariki ya 17 Mutarama 2023, izi mpunzi zasobanuye ko iki ari ikibazo rusange zihuriyeho n’izindi zicumbikiwe mu karere ka Afurika y’ibiyaga bigari kose.
Zivuga ko kuba zimaze iyi myaka yose mu buhungiro biterwa no kwamburwa uburenganzira bw’ibanze, nk’aho bamwe mu banyapolitiki bo muri RD Congo, abo muri za sosiyete sivile, abanyamakuru, abavuga rikumvikana na diaspora batemera ko ari Abanyekongo nka bo.
Izi mpunzi zamenyesheje izi ambasade ko imitwe yitwaje intwaro y’Abanyekongo na FDLR ikomoka mu Rwanda ikomeje kugaba ibitero ku Batutsi mu ntara za Kivu, bagahunga, bagasiga ingo zabo n’imitungo yabo.
Zasabye izi ambasade n’imiryango mpuzamahanga kuzifasha ibibazo byagaragaje haruguru bigakemuka, zibutsa ko Abanyekongo bavuga Ikinyarwanda babayeho kuva kera na mbere y’inama ya Berlin yo mu mwaka w’1885.
