Urwego Ngenzuramikorere (RURA), rwagabanyije ibiciro by’ibikomoka kuri Peteroli ugereranyijwe n’ibyari bisanzweho kuva mu mezi abiri ashize.
Itangazo rikubiyemo ibiciro bishya byatangiye kubahirizwa kuri uyu wa Gatatu tariki ya 01 Gashyantare 2023, RURA yavuze ko igiciro gishya cya lisansi kitagomba kurenga Frw 1,544 kuri litiro, mu gihe icya mazutu kitagomba kurenga Frw 1,562 kuri litiro imwe.
Ibiciro bishya by’ibikomoka kuri Peteroli byasimbuwe ibyari byatangiye kubahirizwa guhera ku wa 05 Ukuboza 2022.
Kuva icyo gihe no mu mezi atatu yari yabanje lisansi yaguraga Frw 1,580 kuri litiro imwe, mu gihe mazutu yaguraga 1,587.
Ibi bivuze ko litiro ya lisansi yagabanutseho Frw 36, mu gihe mazutu yo yagabanutseho Frw 25.
RURA mu itangazo ryayo yasobanuye ko yagabanyije ibi biciro ahanini kubera “igabanuka ry’ibiciro by’ibikomoka kuri Peteroli ku isoko mpuzamahanga.”
