Umusore n’umukobwa bagombaga gusezeranira imbere y’Imana kuri uyu wa 11 Gashyantare 2023 bari mu baherutse gutabwa muri yombi n’urwego rw’igihugu rushinzwe ubugenzacyaha (RIB) mu mpera z’icyumweru gishize.
Umuvugizi wa RIB, Dr Murangira B. Thierry, yatangaje ko aba bose hamwe batawe muri yombi bakurikiranweho icyaha cy’ubujura no gutera inkunga ibikorwa by’iterabwoba, bifitanye isano n’amafaranga banki ikorera mu Rwanda yibwe, hifashishijwe amakarita.
Dr Murangira yasobanuye ko igikorwa cyo guta muri yombi abagize iri tsinda rikekwaho ibi byaha kimaze gufatirwamo abari ku kigero cya 60% kandi ngo kirakomeje.
Umuhango wo gusezeranya aba bageni (U. Nicole na N. Patrick) byari byareteganyijwe ko uzabera muri rumwe mu nsengero ziherereye ku Kimihurura mu karere ka Gasabo mu gitondo, kwiyakira bikabera ku Gisozi.
Uwo mu muryango w’abageni wavuganye na Umuseke, yatangaje ko ifungwa ryabo ryatumye ibikorwa by’ubukwe bwabo byose bihagarikwa.
