Abahagarariye ibiro bya Perezida wa Repubulika ya demukarasi ya Congo, iby’umuhuza w’Abanyekongo, misiyo y’amahoro y’Umuryango w’Abibumbye muri iki gihugu (MONUSCO) n’umuryango wa Afurika y’iburasirazuba (EAC) bari gutegura indi mishyikirano izabera i Kinshasa, Goma no mu yindi mijyi ibiri.
Ikinyamakuru Cas Info gisobanura ko intumwa ya Perezida wa RDC muri iyi mishyikirano yitiriwe Nairobi, Serge Tshibangu, abahagarariye umuhuza Uhuru Kenyatta ndetse n’izi nzego zindi bari muri Naivasha muri Kenya bategura icyiciro cyayo cya kane.
Nyuma y’iyi myiteguro y’iminsi itatu, biteganyijwe ko abayirimo bazageza kuri Uhuru Kenyatta n’abakuru b’ibihugu bya EAC raporo y’imyanzuro yafatiwemo, ku bijyanye by’umwihariko n’ibizakenerwa birimo amafaranga azakoreshwa.
Biteganyijwe ko iki cyiciro cy’imishyikirano kizabera mu mujyi wa Kinshasa no mu yindi yo mu burasirazuba bw’igihugu irimo: Goma, Bunia na Bukavu mu byumweru biri imbere.
