Intumwa idasanzwe y’Umuryango w’Abibumbye mu Biyaga Bigari irasaba ibihugu byo muri aka karere kongera ingufu mu kurwanya imitwe yitwaje ibirwanisho yagize indiri uburasirazuba bwa Repubulika iharanira Demokarasi ya Congo. Ibi Said Djinnit yabitangarije kuri uyu wa Gatatu ushize imbere y’Akanama k’Amahoro n’Umutekano k’Umuryango w’Abibumbye nk’uko itangazo ryashyizwe ahagaragara na Loni rivuga.
“ Ibikorwa bikomeje by’imitwe yitwaje ibirwanisho itemewe bikomeje kuba kimwe mu bibangamiye umutekano w’abaturage no ku mudendezo wa Repubulika iharanira Demokarasi ya Congo n’akarere ”, ibi ni ibyatangajwe na Said Djinnit muri raporo yagejeje ku bagize akanama k’umutekano.
Kuri we, ngo ni ngombwa kongera ingufu zigamije guca intege iyo mitwe yitwaje ibirwanisho, irimo umutwe wa FDLR w’Abanyarwanda, n’uwa ADF w’Abagande, hifashishijwe ibimaze kugerwaho kuri ubu n’ingabo za Repubulika iharanira Demokarasi ya Congo (FARDC) zifatanyije na MONUSCO.
Said Djinnit yakomeje agira ati: “ Kuri iki, ni iby’ingenzi kurushaho kongera imbaraga mu bufatanye hagati y’izi ngufu ebyiri (FARDC na MONUSCO) kandi ni ngombwa nk’uko bishimangirwa n’umwanzuro w’2348 w’akanama k’umutekano, ko umutwe ushinzwe gutabara (Brigade d’intervention) ufashijwe na Monusco yose, byongera ibikorwa by’ibitero byibasira iyo mitwe yitwaje ibirwanisho ”.
Intumwa idasanzwe ya Loni mu Biyaga Bigari kandi muri rusange yashishikarije ibihugu byo mu Biyaga Bigari gukomeza gufata ingamba zigamije gushakira ibisubizo ikibazo cy’imitwe yitwaje ibirwanisho itemewe nk’uko iyi nkuru dukesha Ibiro Ntaramakuru by’Abashinwa, Xinhua, ikomeza ivuga.
Ku kijyanye n’ibibazo bya politiki biri muri Repubulika iharanira Demokarasi ya Congo, Said Djinnit yahamagariye abanyapolitiki b’Abanyekongo gushyira mu bikorwa ibyemeranyijwe mu masezerano yo kuwa 31 Ukuboza, mu rwego rwo gushyiraho uburyo bwo kuzakora amatora anyuze mu mucyo kandi mu mahoro.
Yabahamagariye kwirinda ibikorwa byose byateza ubugizi bwa nabi, yizeza ubufasha bwose bw’Umuryango w’Abibumbye mu gushyigikira no guherekeza impande zose z’Abanyekongo mu gushyira mu bikorwa ayo masezerano.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
