Ubuyobozi bw’itorero ADEPR mu karere ka Rusizi,ubwa Ibuka mu murenge wa Giheke n’ubw’umurenge wa Giheke mu karere ka Rusizi burashimira byimazeyo umurinzi w’igihango Bucyana Epainette ubutwari yagaraje ubwo yahanganaga n’ibitero byazaga gutwika urusengero rwa paruwasi ya ADEPR Ntura kugeza ubwo abicanyi basubijeyo Lisansi bari bazanye ntibatwikiremo abicwaga.
Bucyana ngo yakomeje guhanga na bo bagarutse kwica abari bahahungiye,kugeza ubwo abicanyi na we biyemeje kumwica ariko akabacika,akarokora n’abandi batutsi 5 bahigwaga batari baje mu rusengero.
Ubwo hibukwaga ku nshuro ya 23 abatutsi biciwe mu rusengero rwa paruwasi ya ADEPR Ntura,abarokotse Jenoside batanze ubuhamya bw’ibyago bahaboneye,bagarutse ku butwari bw’uyu Bucyana Epainette wanze kubatererana bagiye kwicwa, ubwo ku wa 9 Mta 1994 interahamwe zazanaga Lisansi yo gutwika urusengero ngo abatutsi barenga 100 bahiremo ariko icyo gitero akakirwanya wenyine kigasubirayo.
Ngo bwarakeye kiragaruka ariko noneho kitazanye ya Lisansi,ngo ahangana na cyo kuva saa moya z’igitondo,bigeze saa tanu z’amanywa abona kimurushije imbaraga yinjira mu rusengero ngo apfafane n’abatutsi bari barimo ariko ajugunywa hanze ubwo abicanyi bari bamaze gucagagura inzugi z’urusengero bagiye kwica abatutsi barimo, bavuga ko na we agomba kwicwa icyakora aza kubacika arahunga n’umuryango we amara iminsi yarahunze.
Ngo yaragarutse agiye kuri gereza ya Cyangugu aho yakoraga,abo bicanyi bamaze kwica abagabo 37 bari muri urwo rusengero, kuri iyo gereza na ho ubuyobozi bwayo buramubwira ngo aje gukora iki ko bafite raporo ye ko yitwaye nabi,ngo adashyigikiye ko abatutsi bicwa,icyakora nubwo yatotejwe gutyo,ngo ntiyaretse umugambi we kuko yagarutse iwe agakomeza kurebwa nabi ariko aranga ahisha abandi batutsi 5 bararokoka.
Abaharokokeye bakavuga ko nubwo interahamwe zabishemo abagabo 37 ariko harokokeye abagore n’abana bose hamwe 69 bakavuga ko iyo adahangana n’ibi bitero na bo baba barashize kuko bari gutwikirwa mu rusengero bose.
Nyuma yo kumva ubu buhamya umushumba w’itorero ry’akarere muri ADEPR ,Pasiteri Cyuma Jean Claude yahise avugira aho ko itorero rimugororeye inka akaba ari na we wa mbere ugororewe n’iri torero muri aka karere kuri urwo rwego.
[xyz-ihs snippet=”google-pub”]
Yagize ati’’ iyo tugira benshi nka we ntituba twabauze abantu kariya kageni,ni yo mpamvu, nk’umuntu wari umukirisitu wacu ntatererane abahungiraga mu rusengero akajya abazanira ibyo kurya,akabasasira aho baryama,agahangana n’ibitero wenyine nubwo hari abo byishe bimaze kumuganza no kuhamumenesha,ariko ubutwari bwe bwagizwe na bake, ni yo mpamvu tugomba kumuha inka.
Yakomeje agira ati’’ tuzamuha inka nziza izamushimisha cyane. Ntizagera ku butwari bwe ariko na we yumve ko ari Leta ari n’itorero ubutwari bwe tubuzirikana.’’
Bucyana usigaye ari umudiyakoni kuri iyi paruwasi yavuze ko kuba yaragizwe umurinzi w’igihango akaba anahawe iyo nka,bimushimishije cyane,asaba abakiri bato kugira neza kuko iyo atayigira ataba ayituwe nyuma y’imyaka 23.
Umuyobozi wungirije wa Ibuka ku rwego rw’umurenge wa Giheke, Sengarambe Innocent na we yavuze ko ubutwari bw’uyu musaza w’imyaka 66 ari ubwo kwigirwaho n’abakiri bato,avuga ko abarokotse Jenoside bazakomeza kumushimira urukundo yabagaragarije ubwo abandi babatereranaga.
Pasiteri Ndorima Elisé uhagarariye umushumba w’iyi paruwasi na we avuga ko bakomeje gushima ubutwari bw’uyu mudiyakoni wabo,kuko kuba yaramenshejwe n’abicanyi yanze ko binjira mu rusengero ngo bakuremo abatutsi babice,yagera no ku kazi akihanangirizwa n’abayobozi b’icyo gihe ngo ku myitwarire ye mibi ikomeje kumuranga yo kurengera inyenzi,akarenga agahisha abandi batutsi 5 bakarokoka,kuba itorero ryamuhaye inka ari ukuzirikana ibyo byose,kandi ko bazakomeza no kumushimira igihe cyose,n’abandi bitwaye nka we bazagaragazwa nyuma.
Abakeneye ko bwiza.com yazabasura, mwatwandikira kuri E-mail ya meckypro@gmail.com,cyangwa mugahamagara kuri 0784685981.
Kanda hano ujye ubona amakuru yihuse kandi kugihe kuri Facebook no kuri twitter
BAHUWIYONGERA Sylvestre.
