Minisitiri w’intebe w’u Bwongereza, Rishi Sunak, yagaragaje ko atizeraga ko hari ikipe yaca agahigo ko gutwara ibikombe bitatu bikomeye nk’uko Manchester United yabigenje mu mwaka w’imikino w’1998/1999 ubwo yatozwaga na Alex Ferguson.
Mu ijoro ryo kuri uyu wa 10 Kamena 2023, Manchester City yegukanye igikombe cya mbere cya UEFA Champions League, itsinze Internazionale de Milano (Inter Milan) yo mu Butaliyani igitego kimwe ku busa.
Iki gikombe cyaje kiyongera ku bindi bibiri City yegukanye muri uyu mwaka w’imikino (2022/2023). Ibyo ni icya shampiyona y’icyiciro cya mbere, Premier League n’icy’igihugu, FA Cup yegukanye itsinze United ibitego 2-1 tariki ya 3 Kamena.
Nyuma y’aho City itozwa na Pep Guardiola yegukanye igikombe cya Champions League, Sunak yanditse ubutumwa bushimira iyi kipe, anagaragaza uburyo atatekerezaga ko hari indi kipe yo mu Bwongereza izakora nk’ibyo United yakoze mu myaka irenga 20 ishize.
Minisitiri w’Intebe yagize ati: “Ntabwo natekerezaga ko hari indi kipe izatwara ibikombe bitatu [mu mwaka w’imikino] mu buzima bwanjye. Uwo waba ushyigikira wese, ni ibigwi bidasanzwe. Hashimwe Pep n’ikipe yose.”
Manchester City ni ikipe ihagaze neza kuva yatozwa na Pep mu mwaka w’2016 kuko imaze gutwara ibikombe 5 bya shampiyona, 2 by’igihugu na 4 bya EFL/Carabao Cup.
