Ku munsi mpuzamahanga w’umurimo, abakoresha bicarana n’abakozi bagatora umukozi wahize abandi mu mwaka ushize maze akabihemberwa. Mu murenge wa Musebeya ntibatanzwe, Undimukobwa Marcelline yahize abandi ahembwa soya.
Ni tariki ya 1 Gicurasi 2017, mu cyumba cy’inama cy’urwunge rw’amashuri rwa Musebeya mu karere ka Nyaruguru, intara y’Amajyepfo. Ni iyo giterwa inkingi, ahahoze ari Komini Nshili ahitwaga Iwabo w’abatebo basigaye ari aba “tres bons”. Uhari uba witegeye u Burundi, wahindukiza amaso ukabona ishyamba rya Nyungwe. Kuhava ujya i Kibeho ahubatse akarere ka Nyaruguru, ni urugendo rw’isaha kuri Moto.
Abarezi b’amashuri abanza n’ayisumbuye muri iki kigo babukereye, abakozi bakora isuku n’indi mirimo ntibatanzwe. Bose bitabiriye umunsi mpuzamahanga w’umurimo, bagaragiye abayobozi b’ikigo n’aba Paruwasi Busanze ikirebererera.
Kubahiriza amasaha y’akazi, haba kujya cyangwa kuva ku kazi ku bakozi bose, abunganira ikigo n’abarimu mu guteza imbere umurimo no kuwunoza, ni bimwe mu byagarutsweho n’umuyobozi w’ikigo cya GS Musebeya Padiri, Sekabibi Faustin.
Ibyagezweho: Umwanya wa gatanu mu karere ka Nyaruguru mu gutsindisha, inka z’umukamo, ibibuga, no kwishyura miliyoni ebyiri
Umwanya nk’uyu ni uwo kwishimira ibyagezweho, no kugena ibikorwa by’igihe kiri imbere. Umuyobozi w’ikigo, Padiri Sekabibi avuga ko yishimira umusaruro wagezweho bityo buri wese akazabona umugarukira.
Ni muri urwo rwego hamuritswe ibyagezweho n’ishuri harimo: gutsindisha neza mu byiciro byombi, aho iki kigo kiri ku mwanya wa gatanu mu karere kose ka Nyaruguru, no gutaha ibibuga by’imikino y’intoki (Basket Ball na Volley Ball).
Harareberwa hamwe kandi umusaruro wagezweho mu murima wa hegitari, ahahinzwe amashaza, ibijumba, ubwatsi, ibishyimbo n’ibindi.
GS Musebeya kandi ifite ubworozi bw’inka zigera kuri eshanu, magingo aya bakaba bishimira umukamo zitanga, ifumbire no kwororoka vuba by’umwihariko.
Ikindi cyo kwishimira, ni uburyo ikigo ubu nta mwenda n’umwe gifitiye uwo ari we wese, nyuma yo kwishyura miliyoni zisaga ebyiri, kikaba gifite n’ibikorwa cyakuraho amafaranga bibaye ngombwa.
Hateganijwe kubaka ibindi bibuga, ku bufatanye bw’abayobozi, abarimu, abakozi bunganira, ndetse n’abanyeshuri binyuze muri gahunda y’umuganda w’ishuri.
Indashyikirwa, Undimukobwa Marcelline yatowe na bagenze be
Igikorwa cyo gutora umwarimu w’indashyikirwa ni kimwe mu byari bitegerejwe na benshi. Hagendewe ku mabwiriza yarateguwe n’umuyobozi w’ikigo. Habanje guhitamo abakandida mu ibanga buri wese atora umuri ku mutima. Maze abakandida bane Mugenzi Telesphore, Undimukobwa Marceline, Esperance, na Habimana Celestin, bahatana mu cyiciro cya kabiri cyeruye, mu mucyo n’ubupfura.
Ubwo rurambikana rubura gica, ariko birangira Undimukobwa aberetse igihandure, n’amajwi 11 kuri 31. Uyu ni nawe uzahagararira abarimu bagenzi be ba GS Musebeya mu murenge wa Busanze, mu karere ka Nyaruguru.
Aganira na Bwiza.com, Undimukobwa aratangaza ko yishimiye igihembo yahawe na padiri mukuru wa paruwasi cya soya yise iy’igikoma cy’abana, ategereje ibindi bihembo ashobora kuzahabwa n’ikigo ndetse n’umurenge.
[xyz-ihs snippet=”google-pub”]
Mu butumwa bw’umunsi Padiri mukuru wa Paruwasi ya Busanze, Yirirwahandi Damien, akangurira abarezi kwita ku burere bw’abana babo “aba bana turera ni abacu”, anashimira abarimu n’umuyobozi w’ikigo ku bw’ibyagezweho no kuguma kubisigasira.
Padiri mukuru yaboneyeho gutanga impano ku mwalimu w’indashyikirwa igizwe n’imbuto ya soya yo gutera.
Uretse GS Musebeya, ibigo nka GS Runyombyi, SACCO Jyambere Busanze, abahinzi bahinga icyayi mu murenge wa Busanze, nabo bahuriye hamwe maze bishimira ibyo bamaze kugeraho ku bw’imiyoborere myiza y’igihugu, ndetse biyemeza no kubisigasira.
Umunsi w’umurimo ufite inkomoko muri Leta zunze ubumwe za Amerika mu myigaragambyo y’abakozi basabaga ko amasaha y’akazi yagabanywa ahayinga umwaka wa 1886.
Kanda hano ujye ubona amakuru yihuse kandi kugihe kuri Facebook no kuri twitter
N.V Bwiza Nyaruguru
