Amagana y’abaturage ba Centrafrique kuva ku wa Gatanu yiraye imihanda y’i Bangui mu murwa mukuru wa Repubulika ya Centrafrique, mu rwego rwo kwamagana Perezida Faustin-Archange Touadéra ushaka kwiyamamariza manda ya gatatu.
Ni nyuma y’uko Leta y’iki gihugu ifashe icyemezo cyo kuvugurura itegekonshinga.
Imyigaragambyo muri Centrafrique yateguwe n’ihuriro ry’amashyaka atavuga rumwe n’ubutegetsi Bloc Républicain pour la Défense de la Constitution (BRDC).
Perezida Touadéra ushaka manda ya gatatu yatowe bwa mbere mu 2016, yongera gutsinda amatora yo mu mpera za 2020.
Bijyanye n’uko atemerewe kwiyamamaza mu matora ateganyijwe mu myaka ibiri iri imbere (yarangije Manda 2 ze) amaze igihe ari mu nzira zo guhindura itegekonshinga.
Muri Gicurasi uyu mwaka ni bwo Perezida Touadéra yatangaje ko igihugu kigiye gukora amatora ya kamarampaka yo kwemera cyangwa kwanga kuvugurura itegekonshinga.
Ni amatora ateganyijwe tariki 30 z’uku kwezi kwa Nyakanga.
Igitekerezo cyo kuvugurura itegekonshinga ubutegetsi bwa Touadéra bwakizanye mu 2020, gusa Danièle Darlan wari ukuriye Urukiko rurengera Itegekonshinga yanzura ko kurihindura bidakurikije amategeko.
Kuri ubu abatavuga rumwe n’ubutegetsi bwa Centrafrique bashinja Perezida Touadéra gushaka kwigira umwami wa kiriya gihugu.
Ku wa Gatanu Leta ya Centrafrique yari yategetse ko imyigaragambyo yo ku wa Gatanu itemewe, gusa ntibyababujije abatavuga rumwe n’ubutegetsi kujya mu mihanda.
Umunyapolitiki Martin Ziguélé utavuga rumwe n’ubutegetsi wigeze kuba minisitiri w’intebe ndetse n’uwa kabiri mu matora ya perezida aheruka, yatangaje ko batazemera ko Itegekonshinga rikorwaho.
Uyu avuga ko Touadéra “arashaka kuba umwami utagira umuntu ugira icyo amubaza…niyo mpamvu twanze kandi turwanya iyi referandumu, itari ikindi uretse ikinyoma cya politike.”
Umuryango w’abibumbye (UN/ONU) uvuga ko iyo referandumu niba hari impungenge ko benshi batazayitabira kubera ibibazo by’umutekano mucye ahatandukanye mu ntara z’iki gihugu.
Loni yaburiye kandi ko bishobora kuganisha ku myigaragambyo ikomeye kurushaho, n’ubushyamirane.
