Umufaransa Bénjamin uheruka kuva muri gereza nyuma yo guhanagurwaho ibyaha byo gufata ku ngufu yari akurikiranweho, yerekeje muri Lorient y’iwabo.
Uyu myugariro ukina inyuma ku ruhande rw’ibumoso yasinye imyaka ibiri muri Lorient.
Mu minsi itanu ishize ni bwo uyu myugariro w’imyaka 29 y’amavuko yavuye muri gereza, nyuma yo guhanagurwaho ibyaha byo gufata ku ngufu yari akurikiranweho.
Lorient yayerekejemo nyuma y’uko mu mpeshyi y’uyu mwaka yari yasoje amasezerano ye muri Manchester City yo mu Bwongereza.
Iyi kipe y’umutoza Pep Guardiola yari yarayigezemo muri 2017, nyuma yo kumugura kuri AS Monaco kuri miliyoni 52 z’ama-Euro.
Uyu myugariro mu mwaka we wa mbere yatwaranye na Manchester City Igikombe cya shampiyona y’Abongereza, mbere yo gutwarana n’Ikipe y’igihugu y’u Bufaransa Igikombe cy’Isi cya 2018.
Lorient yemeje ko yamusinyishije mu itangazo yasohoye kuri uyu wa Gatatu.
Iyi kipe irateganya gukina na AFC Bournemouth yo mu Bwongereza mu mukino wa gicuti uteganyijwe ku wa 05 Kanama, mbere yo guhura na PSG mu mukino w’umunsi wa mbere wa shampiyona y’Abafaransa uteganyijwe ku wa 13 Kanama.
