Abantu batatu bishwe naho abagera kuri bane bakomerekera kuri uyu wa mbere, itariki 08 Gicurasi, mu gitero inyeshyamba za FDLR zifatanyije n’iz’umutwe wa Nyatura zagabye ku birindiro by’ingabo za Congo, FARDC, ahitwa Kitshanga, mu birometero 83 uvuye mu majyaruguru y’uburengerazuba bw’Umujyi wa Goma.
Mu baguye muri ibi bitero, harimo abasirikare bakuru babiri ba leta ya Congo (Captain na Lieutenant) ndetse n’umugore w’umusirikare nk’uko amakuru aturuka ahabereye iki gitero avuga.
Abandi bantu bane kandi, umusirikare ndetse n’abasivili batatu, nabo ngo bakomerekeye muri icyo gitero nk’uko byatangajwe n’igipolisi.
[xyz-ihs snippet=”google-pub”]
Amakuru atandukanye na none nk’uko Radio Okapi dukesha iyi nkuru ikomeza ivuga, aravuga ko iki gitero cyagabwe mu masaha ya saa munani z’igicuku. Kurasana hagati y’inyeshyamba n’abasirikare ngo kukaba kwamaze isaha irenga mbere y’uko ingabo za leta zikuramo akazo karenge zigakora icyo zita Repli stratégique mu rurimi rw’Igifaransa.
Uku gusubira inyuma kw’ingabo za leta kwatumye izi nyeshyamba zicikisha bagenzi bazo bagera kuri 12 bari baratawe muri yombi n’igisirikare ndetse zinasahura amasasu yari abitswe mu bubiko bw’ibikoresho bw’ingabo muri Kitshanga. Izi nyeshyamba nkandi zanashimuse inka 60 zari mu rwuri mbere yo kuburirwa irengero nk’uko bitangazwa na polisi.
Kuva mu gitondo cyo kuri uyu wa mbere, ngo ibikorwa bitandukanye byahagaze muri aka gace, aho abaturage bari bafite impungenge z’uko iki gitero gikurikirwa n’ubugizi bwa nabi bahise bahungira ku birindiro bya Monusco muri Kitshanga.
Iyi nkuru isoza ivuga ko iki gitero cyagabwe mu gihe ingabo za leta zari zihanze amaso cyane kuri Pariki y’Ibirunga aho ngo ziri gusenya ubwihisho bwose bw’inyeshyamba.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
