Ikipe ya APR FC yageze mu ijonjora rya kabiri rya CAF Champions league, nyuma yo gusezerera Gaadiidka FC yo muri Somalia ku giteranyo cy’ibitego 3-1.
Amakipe yombi yari yahuriye mu mukino wo kwishyura w’ijonjora ry’ibanze warangiye APR FC iwutsinze ku bitego 2-0.
Ni nyuma y’ubanza yari yaguyemo miswi igitego 1-1 ku wa Gatandatu w’icyumweru gishize.
Ibitego by’umunya-CamĂ©roun Bemol Apam Assongwe watsindiraga APR FC igitego cya mbere kuva ayigezemo na Mugisha Gilbert winjiye mu kibuga amusimbura, ni byo byafashije ikipe y’Ingabo z’Igihugu kwiyunga n’abafana bayo.
Aba bafana ku wa Gatandatu w’icyumweru gishize bari bakoze igisa n’imyigaragambyo bamagana umusaruro mubi ikipe yari imaze iminsi ibona; biba ngombwa ko ubuyobozi bufata umwanya wo kubaganiriza no kubiseguraho.
APR FC izahurira mu ijonjora rya kabiri na Pyramids FC yo mu Misiri.
Umukino ubanza hagati y’amakipe yombi uteganyijwe kubera kuri Kigali Pele Stadium ku wa 15 Nzeri.
