Umugaba Mukuru w’Ingabo za Mozambique, Admiral Joaquim Mangrasse, ku wa Gatanu yasuye Icyicaro Gikuru cy’Inzego z’umutekano z’u Rwanda mu mujyi wa Mocimboa da Praia.
Admiral Mangrasse yari aherekejwe n’Umugenzuzi Mukuru w’Ingabo za Mozambique, Maj Gen Messias AndrĂ© Niposso, Umugaba w’Ingabo za Mozambique zirwanira ku butaka, Maj Gen Tiago Alberto Nampele, Brig Gen Ricardo Makuvele ukuriye ubutasi cyo kimwe na Brig Gen Chongo Vidigal ukuriye ibikorwa bya gisirikare mu ntara ya Cabo Delgado.
Aba kandi bari kumwe n’abandi bayobozi mu ngabo za Mozambique nk’uko Minisiteri y’Ingabo z’u Rwanda yabitangaje.
Intego ya ruriya ruzinduko yari uguha ikaze ubuyobozi bushya bw’inzego z’umutekano z’u Rwanda ziri muri Mozambique no kuganira na bo ku bikorwa impande zombi zihuriyeho muri iki gihe.
Umugaba Mukuru w’Ingabo za Mozambique yakiriwe na Maj Gen Alex Kagame uyoboye Ingabo z’u Rwanda ziri muri kiriya gihugu wamusobanuriye by’umwihariko ibikorwa inzego z’umutekano z’u Rwanda ziri gukora ndetse n’uko umutekano wifashe mu turere twa Mocimboa da Praia, Palma na Ancuabe Ingabo z’u Rwanda zikoreramo.
Maj Gen Kagame yari kumwe n’abayobozi batandukanye barimo umuyobozi wa Task Force Battle Group 3, umuyobozi w’abapolisi b’u Rwanda bari muri Mozambique, umuhuzabikorwa w’urwego rushinzwe iperereza n’umutekano (NISS) ndetse n’abandi ba Ofisiye bo mu nzego z’umutekano z’u Rwanda.
Umugaba Mukuru w’Ingabo za Mozambique yashimiye inzego z’umutekano z’u Rwanda ku bw’akazi gakomeye zakoze ko kwirukana ibyihebe no gucyura abaturage bari baravuye mu byabo.
