Umunyamakuru Stanis Bujakera uri mu bazwi muri Repubulika Iharanira Demokarasi ya Congo, yatawe muri yombi ku mugoroba wo ku wa Gatanu tariki ya 08 Nzeri 2023.
Bujakera asanzwe ari umuyobozi wungirije w’ikinyamakuru ACTUALITE.CD ndetse akanaba umwanditsi w’ibitangazamakuru bya Jeune Afrique na Reuters.
Amakuru y’itabwa muri yombi rye yemezwa n’ubutumwa abo bakorana banditse babinyujije ku rubuga rwe rwa X (Twitter).
Ni ubutumwa buvuga ko yafatiwe ku kibuga cy’indege mpuzamahanga cya N’djili i Kinshasa, ubwo yari mu rugendo.
Ikinyamakuru ACTUALITE na cyo cyemeje itabwa muri yombi rye, gisaba ko ahita arekurwa by’ako kanya.
Iki gitangazamakuru cuasobanuye ko Stanis Bujakera atabwa muri yombi yari yerekeje i Lubumbashi. Cyavuze ko abamufashe ari abantu babiri bavuze ko bakora muri Polisi y’ubutabera, mbere yo gutwarwa n’Umuyobozi Mukuru wa Polisi ya RDC.
Kugeza ubu ntiharamenyekana icyo uriya munyamakuru yaba yaterewe muri yombi.
Bujakera cyakora yatawe muri yombi mu gihe yakunze gushyirwaho igitutu cyinshi ashinjwa kudakorera mu kwaha k’ubutegetsi bwa Repubulika Iharanira Demokarasi ya Congo.
