Mu ijoro ryakeye ndetse kugeza mu gitondo cyo kuri uyu wa 15 Gicurasi 2017, abatuye umujyi wa Abidjan ,umurwa mukuru w’ubucuruzi wa Cote d’Ivoire baraye kandi baramukiye mu rusaku rw’imbunda ziremereye n’izindi zisanzwe.
Ni ikibazo cya bamwe mu basirikare bariye karungu bari mu myigaragambyo kuva ku wa Gatanu, nyamara iyi myivumbagatanyo ikaba yari itarafata intera ikaze kuri uru rwego rwo kurashisha ibibunda bya rutura.
Jeune Afrique yatangaje ko uku kwigomeka kw’abasirikare kwaba kumaze no kwadukira indi mijyi minini nka Bouaké ,uyu kandi ukaba ariwo mujyi wahoze ari indiri y’inyeshyamba za Force Nouvelle zaje no guhirika ubutegetsi bwa Laurent Gbagbo .
Izi mbunda zikomeje guturika n’ibisasu birimo kuraswa ahantu hatandukanye ngo byaba birimo kurasirwa muri kimwe mu bigo bya gisirikare bikomeye cyane muri Cote d’Ivoire kitwa Akouédo giherereye muri Abidjan rwagati.
[xyz-ihs snippet=”google-pub”]
Bikaba bivugwa ko abagera kuri 6 b’abasivili bamaze gukomerekera harimo n’undi musirikare wavuye ku rugerero waguye mu myigaragambyo ya Bouaké azize ibikomere.
Ibiro bikuru by’ingabo z’Igihugu cya Cote d’Ivoire bikaba yasohoye itangazo zihamagarira buri musirikare wese uri muri iyi myigaragambyo ko utazahagarika kwigaragambya aza kwibonera ibiri bumubeho.
Iri tangazo ryashyizweho umukono na General Sékou Touré ,umugaba w’Ingabo za Cote d’Ivoire ariko niryo ryabaye nk’irikoza agati mu ntozi kuko byagaragaye ko aho kugabanya ubukana ahubwo iki kibazo kiri gukongeza n’ibindi bigo bya gisirikare cyane cyane mu ijoro ry’uyu wa 14 rishyira uwa 15 Gicurasi 2017.
Mu itangazo rya Etat Major kandi hagaragayemo ko abasirikare bose bari muri iki gikorwa basabwa kwibuka ko ibyo barimo bitajyanye n’imigenzereze ya gisirikare hamwe n’indangagaciro zikwiye umusirikare w’igihugu nk’uko JeuneAfrique yakomeje ibivuga.
Umugaba mukuru w’Ingabo kandi yasezeranije abaturage ko hari ibikorwa bihambaye by’abasirikare biri gutegurwa mu rwego rwo guhangana n’aba bigaragambya mu maguru mashya!
Andi makuru ariko atarajya ahagaragara yavugaga ko hari itsinda ry’abasirikare ryavuye muri Etat Major ryagerageje ejo nimugoroba guhura n’abigaragambya .
Bamwe mu ba Komanda bakaze mu Ngabo za Cote d’Ivoire barimo nka Koamnda Issiaka Ouattara ,Chérif Ousmane na Koné Zakaria uyu akaba ari nawe ukuriye abashinzwe kurinda Perezida bari mu bakurikiraga ibi biganiro.
Muri iri tsinda kandi hari hanarimo na Komanda w’umutwe w’aba parakomando ,n’izindi batayo zikomeye mu biganiro bitari byoroshye mu rwego rwo gusaba abari mu myigaragambyo gusubira mu bigo byabo nta mananiza.
Muri Bouaké honyine ejo ku cyumweru hanavuzwe iby’abaturage bashatse kwihuriza hamwe ngo bamagane iby’aba basirikare barimo ariko ntibyabahiriye kuko aho bari bahuriye kuri Rond point yo mu mujyi rwagati ariko bahise baraswaho batandatu muri bo barakomereka barimo abagore batanu n’umugabo umwe.
Ahitwa Korhogo mu Majyaruguru ho nabo abigaragambya barashe mu kirere amasasu menshi abaturage babiri barahakomerekera harimo n’umwe wakomeretse bikabije. Na magingo aya iki kibazo kikaba kikiri ingorabahizi.
Kanda hano ujye ubona amakuru yihuse kandi kugihe kuri Facebook no kuri twitter
David Marchall/Bwiza.com
