U Burusiya bwashyize Piotr Hofmanski ukuriye Urukiko Mpuzamahanga mpanabyaha (CPI) ku rutonde rw’abo rushakisha, nyuma y’amezi make uru rukiko rukorera i La Haye mu Buholandi rusohoye impapuro zo guta muri yombi Perezida Vladimir Putin.
Itangazo ry’uko Hofmanski yamaze gushyirwa mu bahigishwa uruhindu n’u Burusiya ryagaragaye mu bubiko bw’amakuru (database) bwa Minisiteri y’Umutekano muri kiriya gihugu, gusa ntihasobanuwe ibyaha yaba akurikiranweho.
AFP isubiramo amagambo yanditse muri iryo tangazo yavuze ko “Hofmanski Piotr Jozef, ni umunya-Pologne. Arashakishwa hashingiwe ku ngingo y’amategeko ahana ibyaha mu Burusiya.”
Muri Werurwe uyu mwaka ni bwo Perezida Vladimir Putin yashyiriweho na CPI impapuro zo kumuta muri yombi, nyuma yo kumushinja ibyaha bifitanye isano no gushimuta abana b’abanya-Ukraine bahungishirijwe mu Burusiya.
CPI yafashe iki cyemezo mu gihe u Burusiya busanzwe butari mu bihugu binyamuryango bya ruriya rukiko.
U Burusiya nyuma y’uko ziriya mpapuro zari zimaze gusohorwa bwagaragaje ko zitemewe; mu buryo busa no kwihimura na bwo buhita busohora impapuro zo guta muri yombi abacamanza ndetse n’abashinjacyaha ba ICC.
