Uwahoze ari umusirikare ufite ubwenegihugu bwa Norvege n’u Bwongereza wari ufungiye muri Repubulika iharanira Demokarasi ya Congo kuva mu 2009 ashinjwa ibyaha by’ubutasi n’ubwicanyi kuri uyu wa Gatatu yarekuwe yoherezwa iwabo nk’uko byatangajwe na Guverinoma ya Norvege.
Uyu witwa Joshua French w’imyaka 35, na mugenzi we nawe wahoze mu gisirikare cya Norvege witwa Tjostolv Molandyari bari bakatiwe igifungo cya burundu bashinjwa ubwicanyi n’ubutasi bakaba bari bafungiwe I Kinshasa muri gereza ya gisirikare ya Ndolo.
Minisitiri w’Intebe wa Norvege, Erna Solberg mu kiganiro n’itangazamakuru mu murwa mukuru Oslo akaba yagize ati: “ Nejejwe no kubasha kwemeza ko abayobozi ba Congo ejo (kuwa kabiri) bafashe icyemezo cyo kohereza Joshua French muri Norvege .”
Kuri uyu wa Gatatu rero nibwo Joshua French yasesekaye mu gihugu cye, aho kubera umunaniro yagaragazaga yahise yahise ashyikirizwa abaganga ngo bamukurikirane.
[xyz-ihs snippet=”google-pub”]
Iyi nkuru dukesha AFP ikaba ivuga ko Joshua French na Moland bombi bakatiwe igifungo cya burundu n’urukiko rwa gisirikare rwa Kisangani mu burasirazuba bwa Congo bashinjwa ubutasi, gutunga intwaro mu buryo butemewe, kwibisha intwaro, kwifatanya n’abagizi ba nabi ndetse no kugerageza kwica.
Tjostolv niwe wenyine ariko wahamijwe icyaha cyo kwica umushoferi ngo bari bakodesheje I Kisangani, aho bari bagiye nka ba mukerarugendo ariko ngo hari ibindi bagamije nk’uko bitangazwa n’impande zitandukanye muri Congo. Aba bagabo ariko bakaba barisobanuraga bavuga ko bari baje gushinga ikigo cyigenga cy’umutekano muri Congo.
Kuri iki kirego cy’ubwicanyi, Moland yakomeje kugihakana yemeza ko uyu mushoferi yiciwe mu gitero cy’amabandi. Uyu Moland akaba yaraje gusangwa muri Kanama 2013, yapfiriye aho yari afungiye afunganywe na French, maze urukiko ruhamya French kuba ari we wamwishe, ariko itsinda ry’abahanga mu gushaka icyateye urupfu bo muri Norvege boherejwe muri Congo baza gusanga Moland yariyahuye yimanitse.
Nk’uko byasobanuwe na minisitiri w’ububanyi n’amahanga wa Norvege, Bà¸rge Brende, ngo French yoherejwe muri Norvege kubw’impamvu z’ubutabazi gusa nta mbabazi yahawe kandi Norvege nta ngurane yatanze ngo arekurwe.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
