Komisiyo yigenga y’amatora muri Repubulika Iharanira Demokarasi ya Congo, irashinjwa ubujura na Martin fayulu wari umwe mu bari bahanganye na Perezida Tshisekedi, aho avuga ko yariganyije amafaranga yagombaga kwifashishwa mu matora yabaye muri iki gihugu mu kwezi k’Ukuboza.
Martin Fayulu yabwiye itangazamakuru ko Komisiyo y’Amatora (CENI),yibye akayabo k’amadolari angana 1.3 yatanzwe nk’inkunga yo gukoreshwa mu matora. Yagize ati: “Abanyamuryango ba CENI, barariganije biba ifaranga zari zatanzwe ngo zifashe gutegura amatora. Bibye miliyali 1,3, z’amadori y’Amerika.”
Yakomeje avuga ko bo nkabaharanira demokarasi batazahwema kuvuga ko amatora aheruka kuba muri RDC, yari amatora ateye isoni.Ati ” Denis Kadima, ubugome bwo yarabukoze, turasaba rero ko Denis Kadima, na komite ye bose bafatwa bagahanwa n’amategeko.”
Fayulu avuga ko Kadima akwiye kwegura cyangwa agatabwa muri yombi kuko ngo uretse kuba komisiyo ayoboye yarajambije imigendekere myiza y’amatora, anavuga ko uyu mugabo yagize uruhare mu kwibira amajwi Perezida Tshisekedi.
Ni mu gihe Urukiko rushinzwe kurengera Itegeko Nshinga, kuwa Kabiri yatangaje ko Tshisekedi yatsinze amatora bidasubirwaho.Yemeje ibi mu gihe hari hashize iminsi abakandida umunani barimo uyu Fayulu, Katumbi, Mukwege n’abandi basaba uru rukiko ko amatora yasubirwamo ariko rubitera utwatsi.
