Abasirikare bane barimo Lieutenant Colonel batawe muri yombi, nyuma yo gukekwaho umugambi wo gushaka guhirika ku butegetsi Capitaine Ibrahim Traoré uyoboye Burkina Faso mu buryo bw’inzibacyuho.
Abafunzwe nk’uko Jeune Afrique yabitangaje, barimo Lt. Col Evrard Somda wahoze akuriye gendarmerie ya Burkina Faso.
Uyu yatawe muri yombi ku Cyumweru tariki ya 14 Mutarama nyuma yo gufatirwa mu rugo rwe ruherereye mu murwa mukuru, Ouagadougou.
Lt. Col Somda na bagenzi be batatu, batawe muri yombi nyuma yo gukekwaho gucura umugambi wo kwivugana Perezida Ibrahim Traoré cyo kimwe na Oumarou Yabré ukuriye ubutasi bwa Burkina Faso.
Uyu Ofisiye mukuru yatawe muri yombi, mu gihe mu Ukwakira umwaka ushize ari bwo yirukanwe ku nshingano yari afite ashinjwa kugerageza “guhungabanya umutekano w’igihugu”.
Byari nyuma y’amezi make nanone muri Burkina Faso hikanzwe Coup d’état y’abashakaga guhirika ku butegetsi Perezida Ibrahim Traoré.
