Minisitiri w’Ingabo akaba na Visi Minisitiri w’Intebe wa Repubulika Iharanira Demokarasi ya Congo ,Jean Pierre Bemba ari kumwe n’umuyobozi w’Ingabo Christian Tshiwewe basuye umujyi wa Goma kuri uyu wa Gatanu ,aho aje kureba uko umutekano wifashe.
Baje muri uyu mujyi mu gihe urugamba ruhuza FARDC na M23 rumaze gufata indi ntera, aho mu duce tumwe na tumwe dukomeje kuberamo imirwano ndetse hakikangwa ko uyu mujyi nawo wafatwa n’aba barwanyi.
Bemba na Tshiwewe bari kumwe na bamwe mu bandi bayobozi baturukanye i Kinshasa, ndetse na bo yasanze muri iyi ntara ya Kivu y’Amajyaruguru barimo Peter Cirimwami Nkuba usanzwe ari Guverineri wa Kivu y’Amajyaruguru.
Basanze ubuyobozi bw’iyi ntara bwari bwasabye abaturage kwivanga mu mirwano ihuza impande zihanganye mu rwego rwo kwigizayo aba barwanyi ba M23 ngo badafata Goma, nyuma y’uko imirwano yari imaze iminsi ku marembo y’uyu mujyi.
Ntibiramenyekana niba Bemba na Tshiwewe bazanye amabwiriza mashya y’urugamba cyangwa niba baba baje nk’intumwa ya Tshisekedi mu gushaka ibiganiro.Ni mu gihe kuri uyu munsi humvikanye imirwano mu duce dutandukanye nka Mushaki , gusa ntabwo yari ikanganye nk’iyari imaze iminsi ibera hafi na Sake no mu tundi duce tuyikikije.
