Repubulika Iharanira Demokarasi ya Congo yatangaje ko nta masezerano y’ubufatanye mu bya gisirikare iheruka gusinyana n’u Burusiya, bitandukanye n’ibyaherukaga gutangazwa n’iki gihugu cya Perezida Vladimir Putin.
Ku wa Gatatu w’iki cyumweru Ibiro Ntaramakuru TASS by’Abarusiya byatangaje ko Guverinoma y’i Moscou yemeje umushinga w’amasezerano y’ubufatanye mu bya gisirikare hagati yayo na Repubulika Iharanira Demokarasi ya Congo.
Ni umushinga w’amasezerano wemerejwe mu nama y’abaminisitiri yabaye ku wa Kabiri tariki ya 5 Werurwe 2024.
U Burusiya bwari bwatangaje ko muri aya masezerano ingabo zabwo n’iza RDC zizajya zitegura imyitozo ya gisirikare ihuriweho, kuba indege zabwo ndetse n’amato y’intambara zajya zoherezwa muri RDC, kuba u Burusiya bwajya bufasha RDC mu gutoza abasirikare bayo n’ibindi.
Minisiteri y’Ububanyi n’Amahanga ya Repubulika Iharanira Demokarasi ya Congo mu itangazo yasohoye ku wa Kane, yatangaje ko nta masezerano y’ubufatanye mu bya gisirikare iki gihugu cyigeze gisinyana n’u Burusiya.
Iti: “Nta masezerano y’ubufatanye mu bya gisirikare aheruka gusinywa hagati y’u Burusiya na Repubulika Iharanira Demokarasi ya Congo”.
Kinshasa yasobanuye “umushinga w’amasezerano y’ubufatanye wavuzwe ni urugendo impande zombi zatangiye mu 1999. Kuva icyo gihe, iki gikorwa cyatwaye igihe kinini. Guverinoma y’u Burusiya ntiyigeze yemera gusuzuma ibikubiye muri iyi nyandiko, ari na byo bifungurira amarembo ibiganiro bishobora gutuma hasinywa amasezerano”.
Guverinoma ya Congo ivuga ko ibyo kuba yarasinyanye amasezerano n’u Burusiya na yo yabibonye mu itangazamakuru.
Yavuze kandi ko muri iki gihe nta biganiro iri kugirana n’u Burusiya ngo babe basinyana ariya masezerano, ndetse inashimangira ko nta biganiro bishya bya gisirikare yifuza kugirana na bwo bijyanye n’uko Isi ya Politiki ihagaze muri iki gihe.
