Muri uku kwezi kwa Kamena igipimo cy’ibiciro cyagabanutseho 0,6% nk’uko byatangajwe n’ Ikigo cy’Igihugu cy’Ibarurishamibare, NISR.
NISR kandi yatangaje ko mu kwezi gushize kwa Gatandatu, ibiciro mu Mijyi byiyongereyeho 5% ugereranyije na Kamena y’umwaka wa 2023.
Ibi biciro bikaba byariyongereye bitewe ahanini n’ibiciro by’ibiribwa n’ibinyobwa bidasembuye byiyongereyeho 3,1%, n’ibiciro by’ibijyanye n’ubwikorezi byiyongereyeho 23,2%.
Naho mu byaro mu kwezi kwa Kamena 2024, ibiciro byagabanutseho 1,4% ugereranyije na Kamena 2023.
Bimwe mu byatumye ibiciro bigabanuka mu kwezi kwa Kamena 2024 mu byaro, harimo ibiciro by’ibiribwa n’ibinyobwa bidasembuye byagabanutseho 6,6%.
Muri rusange, mu kwezi kwa Kamena 2024 ibiciro mu Rwanda byiyongereyeho 1,1% ugereranyije na Kamena 2023.
Bimwe mu byatumye ibiciro byiyongera mu kwezi kwa Kamena 2024 ku masoko yo mu Rwanda, harimo ibiciro by’ibijyanye n’ubwikorezi byiyongereyeho 22,9%.
Ni mu gihe NISR mu minsi ishize yari yatangaje ko ibiciro byiyongereyeho 14.1% mu kwezi kwa Gicurasi 2023, ugereranyije na Gicurasi 2022.
