Inyeshyamba z’Aba-Tuareg mu majyaruguru ya Mali zavuze ko ku wa Gatandatu zishe kandi zikomeretsa abasirikare benshi bakorana n’igisirikare cy’igihugu .
Inyeshyamba zivuga ko zishe kandi abacanshuro b’Abarusiya bo mu mutwe wa Wagner, mu mirwano yabereye mu majyaruguru y’igihugu, hafi y’umupaka wa Algeria nk’uko iyi nkuru dukesha Reuters ivuga.
Itsinda rya Wagner ryagiye muri Mali nyuma y’uko Akanama k’Umuryango w’Abibumbye gashinzwe Umutekano, umwaka ushize, gatoye guhagarika ubutumwa bw’imyaka icumi bwo kubungabunga amahoro muri iki gihugu cyo muri Afurika y’uburengerazuba.
Itora ry’Umuryango w’Abibumbye ryaje nyuma y’uko abasirikare bahiritse ubutegetsi, bayobowe na Colonel Asimi Goita, basabye ingabo zigera ku 13.000 zari zihari kugenda, igikorwa Amerika yavuze ko cyateguwe na Wagner.
Imirwano ikaze mu majyaruguru ya Mali yaje iminsi ibiri nyuma y’uko ingabo za Mali zavuze ku wa Gatanu ko abasirikare babiri bishwe abandi 10 bagakomereka mu gitero cy’inyeshyamba cyagabwe mu Mujyi wa Tinzaouaten wo ku mupaka.
Ihuriro riyobowe n’inyeshyamba z’Aba-Tuareg ku wa Gatandatu ryatangaje ko ryafashe imodoka z’imitamenwa, amakamyo n’ibindi mu mirwano yo ku wa Kane no ku wa Gatanu.
Umuvugizi w’ihuriro ry’inyeshyamba yavuze ko “umwanzi yagize igihombo kinini mu bijyanye n’ubuzima n’ibikoresho, harimo n’abapfuye ndetse n’abakomeretse.”
Yavuze kandi ko “Abasirikare ba Mali n’abacanshuro bo mu mutwe wa Wagner bishyize mu maboko y’abarwanyi b’Aba-Tuareg.”
Ibi biramutse byemejwe, cyaba ari cyo gihombo kinini cya mbere abacanshuro ba Wagner batewe n’inyeshyamba z’Aba-Tuareg muri Mali.
