Ibirori byo kwizihiza umunsi w’Umuganura mu karere ka Rwamagana byabaye ku wa Gatanu tariki ya 2 Kanama 2024, birangwa no kwishimira umusaruro no gusangira n’abana.
Byabereye mu Murenge wa Musha ku rwego rw’Akarere, binabera mu midugudu igize Akarere ka Rwamagana.
Mu butumwa bwatanzwe n’abayobozi batandukanye, basabye abaturage kugira indangagaciro z’abanyarwanda zirimo Ubumwe, kwigira no gukunda Igihugu.
Umuyobozi w’Akarere ka Rwamagana, Mbonyumuvunyi Radjab, yibukije abaturage ko umuganura ari umwe mu mico y’abanyarwanda .
Yagize ati :”Umuganura tuwukomora mu mateka yacu nk’abanyarwanda. Umuganura ntugarukira mu gusangira, ni n’umwanya wo kuzirikana umutima w’Abanyarwanda n’uburyo twishakamo ibisubizo, abataragize icyo beza tukabaganuza tukanazirikana umuco w’ubumwe no kwigira .”
Meya Mbonyumuvunyi yakomeje agira ati: “Insanganyamatsiko y’Umuganura itwibutsa gushyigikira Gahunda yo kugaburira abana ku ishuri no mu ngo mbonezamikurire z’abana bato ari na yo mpamvu nsaba ababyeyi gukomeza kugira uruhare mu burezi bw’abana, nkanashimira abafatanyabikorwa ku ruhare rwabo mu burezi bw’abana bw’abanyarwanda.”
Insanganyamatsiko ijyanye no kwizihiza umuganura uyu mwaka iragira iti: “Umuganura, Isoko y’ubumwe n’ishingiro ryo kwigira: Tuganure dushyigikira gahunda yo kugaburira abana ku Ishuri”.
Ibi birori byanitabiriwe n’abanyamahanga barimo abafatanyabikorwa bafite ibikorwa mu karere ka Rwamagana.
<
Ibirori byo kwizihiza umuganura byaranzwe no kwishimira umusaruro w’abaturage no gusangira.
