Ministeri y’Ubutegetsi bw’Igihugu, ibinyujije mu Kigo cy’Igihugu gishinzwe Iterambere ry’Uturere (LODA), iherutse kuvugurura imikorere y’abajyanama b’iterambere ry’imibereho myiza (para-social workers), igikorwa cyatangiye hagamijwe gufasha mu gukangurira abaturage gahunda zijyanye no kugabanya ubukene.
Iki gikorwa cyatangijwe mu mwaka wa 2015 cyitwaga “Abakozi b’Inshingano” (Case Workers), nyuma cyaje guhindurirwa izina mu mwaka wa 2021 kikitwa “Abajyanama b’iterambere ry’imibereho myiza” (Para-social Workers), kandi iyi gahunda yahise igezwa mu gihugu hose.
Intego y’iki gikorwa cyo kwegera abaturage ni ugukomeza kunoza ihuriro rya serivisi zitangwa binyuze mu bukangurambaga.
Intego nyamukuru y’iki gice cya VUP ni ugukangurira no gusobanurira abaturage gahunda yo kuva mu bukene bukabije no mu mushinga wa Vision Umurenge Programme (VUP); kwigisha imiryango uburenganzira n’inshingano zayo ndetse no gufasha abaturage kubona amahirwe n’izindi serivisi z’ubukungu.
Aba ba Para social bamwe muri bo bo mu karere ka Rulindo, bahawe amahugurwa muri Kamena 2024, bizezwa ko mu gihe kitarenze icyumweru kimwe bazaba bahawe amafaranga y’insimburamubyizi kuko iyo babaga bagiye guhugurwa basigaga ibikorwa byabo bakagenda ndetse bamwe muri bo hari abategaga za moto ngo babashe kugera aho bahugurirwaga abandi bakizirika umukanda kugirango ayo mafaranga nabo azabaramire.
Kuri ubu hashize amezi asaga ane bategereje doreko bavugako bahuguwe iminsi 5 kandi buri munsi baragenerwaga amafaranga ibihumbi 5000 ni ukuvuga ko babarimo umwenda w’amafaranga ibihumbi 25 buri umwe umwe.
Uwimana Jean Bosco,ushinzwe ibikorwa birimo n’aba ba “Para social” mu karere ka Rulindo, yemereye BWIZA ko koko hari abahuguwe bakaba batarahabwa insimburamubyuzi yabo avuga ko ikibazo cyapfiriye muri sisitemu(System) ngo hari abatanze Konti zitarizo aho yavuze ko imirenge ya Tumba na Ntarabana aribo bafite ikibazo gusa abandi bayabonye.
Ku ruhande rw’Ikigo cy’Igihugu gishinzwe Iterambere ry’Uturere, LODA nabo bemera ko aba bantu babafitiye umwenda, aho bavuze ko iki kibazo bakizi,
Bati:” Iki kibazo twarakimenye kandi LODARwanda irimo kugikurikirana ku buryo muraza kubona insimburamubyizi yanyu vuba cyane.”
Abajyanama b’iterambere ry’imibereho myiza (Para-Social workers), batoranywa n’abaturage b’aho batuye kandi buri mudugudu ugira umwe, uretse ko hari imidugudu imwe iba itamufite bitewe n’impamvu zirimo kwimurwa kw’abaturage bari batuye mu bice byashyizwe mu byago bikomeye[High risk zones]. Muri rusange, mu gihugu hose hari abajyanama b’abakorerabushake b’umurenge 14,719.
