Abarwanyi ba kisilamu barwanira muri Burkina Faso baba barimo gukoresha mw’ibanga, ibice by’amajyaruguru ya Ghana, mu kubika intwaro n’ibikoresho harimo n’ibyo mu buvuzi, kugirango babashe gukomeza ibitero byabo nk’inyeshyamba.
Mu batanze aya makuru harimo abashinzwe umutekano muri Gana ndetse n’abadipolomate bo mu karere. Bavuze ko abategetsi ba Ghana basa nk’abirebera hirya mu gihe inyeshyamba zambuka ziva mu gihugu cy’abaturanyi cya Burkina Faso, zijya guhunika ibiribwa, lisansi yemwe n’ibisasu biturika, ari nako bajyana abakomerekeye ku rugamba kuvurirwa mu bitaro.
Cyakora bavuze ko ubwo buryo, mu gihe kugeza ubu bwarinze Ghana ibitero bya kiyisilamu bushobora gutuma abarwanyi bashinga imizi muri iki gihugu kandi bakaba bakwinjiza muri uwo mutwe, bamwe bo mu bahejejwe inyuma bahasanze.
Ghana isangiye umupaka wa kilometero 600 na Burkina Faso, igihugu cyabaye indiri y’inyeshyamba zahitanye abantu ibihumbi n’ibihumbi kandi zavanye mu byabo ababarirwa muri za miliyoni. Nk’uko zimwe mu mpuguke zibivuga, izo nyeshyamba zahinduye akarere ka Sahel indiri y’iterabwoba ku isi, mu gihe imitwe ishyigikiye al Qaeda na Leta ya kisilamu yarushijemo kuboneka hirya no hino. Bitandukanye na Benin na Togo, Ghana nta gitero gikomeye yagabwaho.
Ambasaderi wa Ghana muri Burkina Faso, Boniface Gambila Adagbila, yabwiye ibiro ntaramakuru Reuters ko aba barwanyi bifashishije imipaka itarinzwe bihagije, kandi ko babonye ko Ghana ari “ahantu hatekanye”. Gusa, yahakanye amakuru yakwumvikanisha ko abayobozi baba baragiranye amasezerano abuza ubushotoranyi n’abajihadiste.
