Igisirikare cya Israel (IDF) cyatangaje mu gitondo cyo kuri uyu wa Gatanu, itariki 1 Ugushyingo 2024, ko Captain Yarden Zakay yapfuye azize ibikomere yakuye mirwano muri Gaza ku itariki 17 Nzeri 2024.
Capt. Zakay, wari ufite imyaka 21, ukomoka i Hadera, yari umuyobozi wa platatoon yo muri Batayo ya Shaked, Brigade ya Givati.
Nyuma y’urupfu rwe yazamuwe ku ntera ava kuri lieutent aba captain nk’uko iyi nkuru dukesha Jerusalem Post ivuga.
Yashyinguwe kuri uyu wa Gatanu saa saba ku irimbi rya gisirikare i Hadera, nk’uko bigaragara ku mbuga nkoranyambaga zimwe.
Umubare w’abasirikare bapfa ukomeje kwiyongera
Nk’uko imibare ya IDF ibigaragaza, urupfu rwa Capt. Yarden Zakay watumye umubare w’abasirikare bamaze gupfa, kuva nyuma y’igitero cya Hamas mu majyepfo ya Israel ku itariki ya 7 Ukwakira umwaka ushize, umaze kurenga 900.
Abagera kuri 366 muri bo bishwe kuva ibikorwa bya gisirikare byo ku butaka byatangira muri Gaza ku itariki ya 27 Ukwakira.
