Abatavuga rumwe na Leta bavugaga ko badashyigikiye Leta y’u Burundi mu mushinga ifite imbere wo kuvugurura Itegeko Nshinga, none barimo gukangurira abayoboke b’amashyaka bahagarariye kwiyandikisha.
Uretse amashyaka ahuriye mu impuzamashyaka CNARED yanze kuyandikisha, ayandi yose arimo gukangurira abaturage kwiyandikisha ngo bazabashe gutora YEGO cyangwa OYA ngo Itegeko Nshinga ribe ryahindurwa.
Aba batavuga rumwe na Leta bavugaga ko mu gihe Itegeko Nshinga rizaba ryahinduwe, amasezerano y’i Arusha yashyizweho umukono n’imitwe itandukanye ya politiki harimo na CNN-FDD, azaba ashyinguwe.
Abatavuga rumwe na Leta bakorera imbere mu gihugu bazatora, ku isonga ni Agathon Rwasa uhagarariye Amizero y’Abarundi, yafashe iya mbere asaba abarwanashyaka b’ishyaka ahagarariye n’abandi barundi muri rusange, kwiyandikisha kugirango bazabashe gutora kamarampaka muri Gicurasi n’umukuru w’igihugu muri 2020.
Leonce Ngendakumana n’umunyamabanga w’ishyaka FRODEBU basabye abarwanashyaka babo kwiyandikisha bagira bati “kwiyandikisha ni uburengenzira bwa buri mwenegihugu”.
Thacien Sibomana wa UPRONA we yagize ati “Abatavuga rumwe na Leta batiyandikishije bakwisanga nta burenganzira bafite bwo kujya mu matora yo mu 2020.
Nk’uko ikinyamakuru UBM News kibitangaza, abantu benshi ngo bakomeje kwibaza ukuntu aba banyapolitiki bakanguriye abaturage kwiyandikisha mu gihe banengaga Leta ko ishaka guhindura Itegeko Nshinga igamije kugumisha Perezida Nkurunziza ku buyobozi, ibyo ngo bikaba ari ingaruka zishobora kuba mbi ku gihugu mu gihe bizaba bikuyeho amasezerano y’i Arusha.
