Abagaba b’ingabo zo muri EAC bahuriye i Bujumbura

Abagaba b’ingabo zo mu bihugu bigize umuryango w’akarere ka Afurika y’iburasirazuba (EAC) bahuriye mu nama yabereye mu murwa mukuru w’ubukungu w’u Burundi, Bujumbura.

Iyi nama yabaye kuri uyu wa 9 Ugushyingo 2022 yatumiwemo komanda w’ingabo ziri mu butumwa bw’amahoro bw’Umuryango w’Abibumbye muri Repubulika ya Demukarasi ya Congo (MONUSCO), General Marcos De Sá Affonso Da Costa, wari indorerezi.

Gen. Affonso wemeje inkuru y’iyi nama yatangaje ko yabonye umwanya wo kwakirwa no kuganira n’abagaba b’ingabo barimo Gen. Prime Niyongabo w’u Burundi wanamutumiye ndetse na Lt Gen. Songesa Tshiwewe Christian wa RD Congo.

Ku wa RDC, Gen. Affonso yagize ati: “Nabonye umwanya wo guhura na Lt Gen. Songesa Tshiwewe Christian, Umugaba Mukuru wa RDC, mu gihe cy’inama y’abagaba bakuru b’ingabo z’umuryango wa Afurika y’iburasirazuba i Bujumbura. Twaganiriye ku bikorwa by’ingabo za MONUSCO na FARDC.”

Aba bagaba b’ingabo baganiriye ku cyemezo cya EAC cyo kurwanya imitwe yitwaje intwaro igikorera mu burasirazuba bwa RD Congo, no gushyiraho ba ofisiye bungiriza komanda w’ingabo zizajya muri iyi misiyo, bakazakorera inshingano yabo ku cyicaro gikuru cyashyizwe mu mujyi wa Goma.

Icyemezo cyo guterana kw’aba bagaba bakuru cyafatiwe mu nama y’abakuru b’ibihugu bya EAC yabereye mu Misiri ku wa 7 Ugushyingo 2022. Ni mu gihe bari bitabiriye inama mpuzamahanga yerekeye ku kurwanya imihindagurikire y’ibihe yari ibaye ku nshuro ya 27, COP27.