Abajura batatu bateye urugo rw’Umuyobozi Mukuru wungirije wa Polisi ya Kenya, AIGP King’ori Mwangi, ruherereye mu gace ka Pembe Tatu mu Karere ka Nyeri, bamaramo amasaha umunani, bafite umugambi wo kwiba ibintu byose birimo.
Umuyobozi wa Polisi ya Nyeri, Adiel Nyange yabwiye itangazamakuru ko ahagana saa kumi n’ebyiri z’umugoroba ku wa 30 Kanama 2021 ari bwo aba bajura barimo umunyeshuri wiga mu mwaka wa gatatu wa kaminuza, umukunzi w’umukozi wo mu rugo wa IAGP Mwangi n’irindi bandi binjiye muri uru rugo.
Muri ayo masaha hari umugore wari muri uru rugo. Komanda Nyange yasobanuye ko aba bajura bamugose, bamusubiza mu nzu, bamutera ubwoba ko natabaza bamwica.
Batangiye gusaka icyumba ku kindi biba ibiribwa, ibikoresho bikoresha ingufu z’amashanyarazi, imyambaro n’inkoko ibaze, bagera ku mutamenwa wa AIGP Mwangi, barawufungura bibamo udukoresho dusukura imbunda, amasasu, ingoferi za polisi, imbunda ntoya 12 za Gauge Taurus, pisitoli n’ibindi…
Komanda Nyange yavuze ko muri iki gihe basakaga uru rugo, bategetse uyu mugore kubatekereza ubugari n’inyama.
Ngo byageze mu masaa saba n’iminota mike y’urukerera, haza moto ebyiri, bazikoresha batwara ibyo bari bibye, zigenda, zibigezayo, zigaruka zigatwara ibindi.
Komanda Nyange yavuze ko abaturanyi ba AIGP Mwangi batangiye kumva izi ngendo za moto zigenda zigaruka kenshi zidasanzwe, maze bahamagara polisi ngo ize irebe ikibazo gihari. Ati: “Ntabwo Polisi yahamagariwe muri uru rugo, ni abaturanyi baho babikoze. Batanze amakuru ku ngendo za moto bumva zidasanzwe, hoherezwa amatsinda y’uburinzi.”
Ubwo abapolisi ngo bahageze, bafata moto imwe mu zatundaga ibyibano, ifata n’aba bajura, ndetse ngo yamaze kugaruza ibyari byibwe mu rugo rwa AIGP Mwangi byose.
Kuri uyu wa 31 Kanama 2021, Polisi yari imaze guta muri yombi abantu batanu bakekwaho uruhare muri ubu bujura.
