Ikipe ya Sunrise FC iherutse kumanuka mu kiciro cya kabiri yamaze gutandukana n’abakinnyi bayo bamanukanye nayo nyuma y’uko banze kugabanyirizwa imishahara.
Sunrise FC ni imwe mu makipe yamanutse ku kiciro cya kabiri muri shampiyona y’umwaka ushize wa 2023/24 aho yamanukanye na Etoile de l’Est nyuma yo gusoza mu myanya y’inyuma ku rutonde rw’amakipe 16.
Nyuma y’uko iyi kipe yo mu karere ka Nyagatare imanutse mu kiciro cya kabiri yahise isaba abakinnyi bayo ko bagabanyirizwa imishahara gusa abakinnyi bo ntibabikozwa.
Muri iki cyumweru nibwo ubuyobozi bwa Sunrise FC bwamenyesheje abakinnyi bose ko bagiye kujya bahembwa 30% y’amafaranga bahembwaga ubwo bari bari mu kiciro cya Mbere.
Bacyumva ubusabe bw’ubuyobozi bw’ikipe, abakinnyi bose ntibabyakiriye neza kuko babyamaganiye kure bavuga ko batagabanyirizwa imishahara ngo babyemere.
Amakuru avuga ko nyuma y’uko aba bakinnyi banze kugabanyirizwa imishahara, ubuyobozi bwa Sunrise bwahise bubaha uburenganzira bwo kujya gushaka andi makipe kuko yo ntigifite ubushobozi bwo kubahemba.
Bitangazwa ko abakinnyi ba Sunrise bose bamaze kurekurwa na yo nyuma y’uko banze kugabanyirizwa imishahara.
